उन्हाळ कांदा लागवडीला मजूरटंचाईचा अडथळा

नाशिक  : दिवाळीनंतर उन्हाळ कांदा लागवडीला नाशिक जिल्ह्यात वेग आला आहे. यंदा जिल्ह्यातील जवळपास सर्वच तालुक्यांमध्ये झालेला जोरदार पाऊस आणि सध्या कांद्याला मिळणारे चांगले दर, यामुळे कांदा क्षेत्रात वाढ होण्याची शक्यता आहे; मात्र शेतमजुरांच्या कमतरतेमुळे शेतकऱ्यांना अव्वाच्या सव्वा पैसे देऊन मजूर मिळवावे लागत असल्याने फक्त कांदा लागवडीचा प्रतिएकर खर्च सात हजारांवर पोचला आहे.

कांदा उत्पादनात नाशिक जिल्ह्याचे नाव देशभरात आघाडीवर आहे. लासलगाव, पिंपळगाव बाजार समितीतून तर जगभरात कांद्याची निर्यात केली जाते. सध्या कांद्याला चांगला भाव मिळत असल्यामुळे शेतकऱ्यांचा कांदा लागवडीकडे कल वाढला असतानाच आता उत्पादन खर्चात झालेल्या वाढीमुळे कांदा आतापासूनच शेतकऱ्यांच्या डोळ्यात पाणी आणू लागला आहे.

शेतकऱ्यांना एकर किंवा गुंठेवारीनुसार मजुरांकडून लागवड करून घ्यावी लागते; मात्र त्यासाठी एका एकराला सात ते साडेसात हजार रुपये मोजावे लागत आहेत. मजुरांची मागणी वाढल्यास या रकमेत अधिक वाढ होते. शिवाय मजूर दुसऱ्या गावातून आणण्याची वेळ पडल्यास वाहतुकीवरही अतिरिक्त खर्च शेतकऱ्यांनाच करावा लागत आहे. मागील वर्षीच्या प्रमाणात यंदा मजुरीत वाढ झाली असल्याचे शेतकऱ्यांकडून सांगण्यात येत आहे.