नाशिक जिल्ह्यात परतीच्या पावसाने नुकसान

नाशिक : नाशिक जिल्ह्यात मागील तीन चार दिवसांपासून विविध ठिकाणी झालेल्या परतीच्या पावसाचा फटका शेतीपिकांना बसला. शिवाय वीज पडून दोन जण ठार, तर दोन जण जखमी झाले. या नुकसानीची माहिती संकलित करण्याचे काम जिल्हा प्रशासनाकडून सुरू आहे.

अनेक दिवसांच्या प्रतीक्षेनंतर परतीच्या पावसाने सोमवारी (ता.१) व मंगळवारी (ता.२) असे सलग दोन दिवस शहरासह जिल्ह्याच्या काही भागात दमदार हजेरी लावली. वादळी वाऱ्यासह आलेल्या पावसाने काही ठिकाणी झाडांच्या फांद्याही तुटून पडल्या. चांदवड तालुक्यातील देवरगाव, जोपूळ परिसराला गारपीटीने तडाखा दिला. यात काही घरांचे पत्रे उडाले, पोल्ट्री फार्मचे नुकसान झाले. पेठ तालुक्यातही गारांचा पाउस झाला.

दत्तु सुकदेव बोरसे (रा. उत्तमनगर, सिडको) यांच्या अंगावर वीज पडल्याने त्यांचा जागीच मृत्यू झाला. ते देवरगाव येथील रोहीले फाट्यानजिक आंब्याच्या झाडाजवळ पावसापासून बचावासाठी उभे होते. तेव्हा त्यांच्या अंगावर वीज कोसळली. प्रकाश गंगाधर देशपांडे (रा. कामटवाडे) हे जखमी झाले. त्यांच्यावर खजगी रुग्णालयात उपचार सुरू आहेत. कचरु सुका वाडगावकर (वय ४०, रा. गोधड्याचा पाडा, ता. त्रंबकेश्वर) यांच्या अंगावर बुधवार (दि. ३) सायंकाळी वीज पडून जखमी झाले. त्यांच्यावर त्रंबकेश्वर येथील शासकीय रुग्णालयात उपाचार सुरू आहेत. पेठ तालुक्यातही वीज पडल्याने नीलेश बाळू वार्डे ( वय ३३) गंभीर जखमी झाले. नाशिक येथे उपचारादरम्यान त्यांचा मृत्यू झाला असल्याची माहिती जिल्हा प्रशासनाला दूरध्वनीवरून कळविण्यात आली. त्यांच्या मृत्यूची नोंद अद्याप लेखी स्वरूपात जिल्हाप्रशासनाला प्राप्त झालेली नाही.

वांगणी गावातील गंगाराम जाणू प्रधान, रामा जाधव, यशवंत चिमणा प्रधान यांच्या घरांचेही पावसामुळे नुकसान झाले. त्याचे प्राथमिक पंचनामे करण्यात आले असून त्याचा अहवाल जिल्हा प्रशासनाने मदतीसाठी पाठवला आहे.