जळगाव जिल्ह्यात वांग्याची लागवड रखडली

जळगाव : यंदा जोरदार पावसाअभावी या वांग्याची लागवड रखडल्याने जळगाव जिल्ह्याची विशेष ओळख असलेल्या भरीताच्या वांग्यांचा हंगाम यंदा उशिरा येण्याची शक्यता आहे. वाफ्यांमध्ये रोपे तयार झाली आहेत. परंतु त्यांची लागवड करण्यासाठी जोरदार पावसाची आवश्यकता आहे.

जिल्ह्यात रावेर, यावल, जळगाव, भुसावळ व मुक्ताईनगर या तालुक्‍यांमध्ये भरीताच्या वांग्याची लागवड केली जाते. क्षेत्र सुमारे ७०० ते ८०० हेक्‍टर असते. यावलमधील भालोद, पाडळसे, बामणोद, पिळोदा, सांगवी बुद्रुक, आमोदे बुद्रुक, न्हावी प्र.यावल येथे,  रावेरातील मस्कावद, वाघोदा भागात, मुक्ताईनगरमधील तापीकाठावरील गावांमध्ये, भुसावळात तळवेल, पिंप्रीसेकम, वरणगाव परिसरात आणि जळगाव तालुक्‍यात आसोदे, भादली बुद्रुक, विदगाव, तुरखेडा, कानळदा या भागात लागवड केली जाते.  

लागवडीसाठीची रोपे मे महिन्याच्या अखेरीस वाफ्यांमध्ये शेतकऱ्यांनी पेरली. त्यासाठी घरी जतन केलेल्या बियाण्याचाच वापर परंपरेनुसार केला आहे. जुलैच्या सुरवातीला लागवडीचा प्रघात आहे. दिवाळीला भरताची वांगी उपलब्ध व्हावीत, असे नियोजन असते. मध्यंतरी पाऊस आल्यानंतर लागलीच सऱ्या पाडण्याचे काम वांगी उत्पादकांनी केले. 

वांगी लागवडीसाठी भिज पावसाचे वातावरण अनुकूल असते. हलका पाऊस आणि उन्हामुळे शेतकरी वांग्याची लागवड टाळत आहेत. रोपे अशा वातावरणात तग धरत नाहीत. कृत्रिम स्रोतांमधून सिंचनाची सुविधा शेतकऱ्यांकडे आहे, परंतु त्यावर रोपे फारशी जोमात वाढत नाही. पावसाचे पाणी अतिशय गुणकारक असते, एकही रोप मरत नाही, असे शेतकरी मानतात. अनेक शेतकरी रोपे बामणोद, भालोद, पिळोदा भागातून विकत आणतात. तेथे एक एकरसाठी आवश्‍यक रोपांसंबंधी सुमारे १८०० ते २००० रुपये मोजावे लागतात.