सोलापुरात भेंडी, दोडका, हिरवी मिरची पुन्हा तेजीत

सोलापूर ः सोलापूर कृषी उत्पन्न बाजार समितीच्या आवारात गत सप्ताहात भेंडी, दोडका, हिरवी मिरची पुन्हा एकदा तेजीत राहिली. त्यांची आवकही तुलनेने कमी राहिली, तरी उठाव चांगला असल्याने तेजी राहिल्याचे बाजार समितीच्या सूत्रांकडून सांगण्यात आले. बाजार समितीच्या आवारात गत सप्ताहात भेंडीची रोज १५ क्विंटल, दोडक्‍याची २० क्विंटल आणि हिरव्या मिरचीची ४० क्विटंलपर्यंत आवक होती. गेल्या पंधरवड्यापासून त्यांच्या आवकेत सातत्याने चढ-उतार होत राहिला; पण मागणी चांगली असल्याने दरातील तेजी वाढली. अलीकडच्या काही आठवड्यांच्या तुलनेत त्यांची मागणी आणि आवक याचा विचार करता या सप्ताहात त्यांना पुन्हा मागणी वाढल्याचे दिसून आले. शिवाय दरही टिकून राहिले. भेंडीला प्रतिदहा किलोसाठी १०० ते ३०० रुपये, दोडक्‍याला ८० ते २५० रुपये आणि हिरव्या मिरचीला ९०  ते ३०० रुपये असा दर मिळाला. त्याशिवाय काकडी, गाजरालाही चांगला उठाव मिळाला. काकडीला प्रतिदहा किलोसाठी ७० ते २०० रुपये आणि गाजराला ६० ते १५० रुपये असा दर मिळाला. भाज्यांमध्ये मेथी, कोथिंबीर, शेपू यांचे दरही काहीसे स्थिरच राहिले. भाज्यांची आवक दहा हजार पेंढ्यांपर्यंत राहिली. मेथीला प्रतिशंभर पेंढ्यांसाठी २०० ते ३०० रुपये, शेपूला १०० ते २५० रुपये आणि कोथिंबिरीला १५० ते २७० रुपये असा दर मिळाला. पालक आणि चुक्‍याला प्रत्येकी २५० रुपयांपर्यंत दर मिळाला.  कांद्याच्या दरातील तेजी टिकून कांद्याच्या दरातील तेजी या सप्ताहातही पुन्हा टिकून राहिली. कांद्याची आवक मात्र या सप्ताहात मोठ्या प्रमाणात वाढली. रोज ३०० ते ४०० गाड्यांपर्यंत राहिली. सप्ताहाच्या शेवटच्या दिवशी शनिवारी ही आवक तब्बल ५०९ गाड्यांपर्यंत उच्चांकी आवक झाली. पण संपूर्ण सप्ताहात दर मात्र तेजीत आणि टिकून राहिले. कांद्याला प्रतिक्विंटल २०० ते ४००० व सरासरी २२०० रुपये इतका दर राहिल्याचे बाजार समितीच्या सूत्रांकडून सांगण्यात आले.