पुण्यात जमिनीचे नकाशे एका ‘क्‍लिक’वर

पुणे :  जमिनीशी संबंधित जवळपास १३ प्रकारचे नकाशांचे भूमी अभिलेख विभागाकडून ‘डिजिटायझेशन’ करण्यात येत आहे. त्यामुळे नागरिकांना नगर भूमापन (सिटी सर्व्हे) आणि जमिनीशी निगडित इतर नकाशे लवकरच एका क्‍लिकवर उपलब्ध होणार आहेत.

नागरिकांच्या मागणीनुसार विविध प्रमाणातील नकाशांमुळे मोजणीची प्रक्रिया जलद होण्यास मदत होणार आहे. सध्या नागरिकांना जमीन मोजणीसह अन्य जमिनीच्या नकाशांसाठी भूमी अभिलेख कार्यालयांमध्ये हेलपाटे मारावे लागत होते. त्यावर उपाय म्हणून भूमी अभिलेख विभागाकडे टिपण, फाळणी, फेर स्केच, पोट वाटप, सविस्तर भूमापन, गटबुक, त्रिमितीय नकाशे (ट्रॅंग्युलेशन शीट), नगर भूमापन, भूसंपादन आदी १३ प्रकारचे नकाशे उपलब्ध आहेत.

जूनपासून या नकाशांच्या आकृत्यांचे (पॉलीगॉन्स) स्कॅनिंग करण्याचे काम सुरू आहे. स्कॅन करण्यात आलेले ‘पॉलीगॉन्स’ नकाशे संगणकीय भाषेत (बायनरी लॅंग्वेज) रूपांतरित करून डिजिटलपद्धतीने सर्वरला साठवून ठेवण्यात येत आहे. जून २०१८ पर्यंत हे काम शंभर टक्के पूर्ण करण्याचे नियोजन करण्यात येत आहे.

पुणे जिल्ह्यात दहा प्रकारचे नकाशे उपलब्ध असून, सुमारे ३७ लाख ८४ हजार ५०९ ‘पॉलीगॉन’चे स्कॅनिंग करण्यात येत आहे. त्यापैकी आतापर्यंत ३ लाख १५ हजार ६२६ पॉलीगॉन स्कॅनिंगचे काम पूर्ण झाले आहे. तर एकूण ३ लाख ९७ हजार नकाशांपैकी ४१ हजार ५८९ नकाशांचे डिजिटायझेशन पूर्ण झाले आहे. डिजिटायझेशन झालेले नकाशे नागरिकांच्या मागणीनुसार आवश्‍यक त्या आकारांमध्ये (स्केल) पाहणे, आणि त्याच्या प्रति (प्रिंटआऊट) घेणे देखील शक्‍य होणार आहे.

जिल्हा भूमी अभिलेख कार्यालयाकडून ‘पॉलगॉन्सचे स्कॅनिंग’ आणि नकाशांचे डिजिटायझेशन करणे, संगणकीय प्रणालीमध्ये त्यांची साठवणूक करण्याचे काम सुरू आहे. जून २०१८ पर्यंत हे काम पूर्ण करण्याचे नियोजन आहे. त्यानंतर नागरिकांना संकेतस्थळावर सर्व नकाशे एका क्‍लीकवर पाहता येऊ शकेल. - एम. बी. पाटील, अधीक्षक भूमी अभिलेख, पुणे