तुरीत आढळली शेंगा पोखरणाऱ्या अळीची अंडी

जालना : पावसाच्या प्रदीर्घ खंडामुळे खरीप जवळपास हातचा गेलेल्या मराठवाड्यातील शेतकऱ्यांची सारी भीस्त आता तुरीच्या पिकावर आहे; परंतु हे पीकही कळी व फुले लागण्याच्या अवस्थेत असतानाच या पिकामध्ये शेंगा पोखरणाऱ्या अळींनी अंडी घातल्याचे तज्ज्ञांच्या शिवार पाहणीत समोर आले आहे. त्यामुळे शेतकऱ्यांनी याविषयी दक्षता घेण्याचा सल्ला तज्ज्ञांनी दिला आहे.

मराठवाड्यात तुरीचे क्षेत्रही जवळपास ४ लाख ९८ हजार हेक्‍टरवर विस्तारलेले आहे. दरम्यान १९ ऑगस्टनंतर आलेल्या पावसामुळे मराठवाड्यातील तुरीच्या पिकाची अवस्था सुधारली. त्यामुळे ऑक्‍टोबरच्या तिसऱ्या आठवड्यातील अंदाजानुसार यंदा तुरीच्या उत्पादनात घट न येण्याचा अंदाज वर्तविला जात आहे.

जालना जिल्ह्यातील कृषी विज्ञान केंद्राचे शास्त्रज्ञ, कृषी विभागाचे अधिकारी, आत्माचे अधिकारी-कर्मचारी यांनी नुकतीच बदनापूर तालुक्‍यातील आसोला, तुपेवाडी, चनेगाव व मसला या गावातील तूर, कापूस, ज्वारी, हरभरा, डाळिंब, पेरू, द्राक्ष आदी पिकांची पाहणी केली. या पाहणीमध्ये या गावशिवारातील तुरीच्या पिकांमध्ये मोठ्या प्रमाणात शेंगा पोखरणाऱ्या अळीने अंडी घातली असल्याचे तज्ज्ञांच्या निदर्शनास आले.

या किडीच्या नियंत्रणासाठी शेतकऱ्यांनी निंबोळी अर्क २० मिलि अधिक क्‍विंनॉलफॉस ३० ई.सी. २० मिलि १० लिटर पाण्यात मिसळून फवारणी करावी. पहिल्या फवारणीनंतर १० दिवसांच्या अंतराने दुसरी फवारणी इमॅमेक्‍टीन बेनझोएट या औषधाची ५ मिलि १० लिटर पाण्यात मिसळून फवारणी करण्याचा सल्ला तज्ञांनी दिला. जिल्हा मासिक चर्चासत्राच्या निमीत्ताने आयोजित पाहणी दौऱ्यात खरपुडी कृषी विज्ञान केंद्राचे शास्त्रज्ञ अजय मिटकरी, अधीक्षक कृषी अधिकारी दशरथ तांभाळे, आत्माचे प्रकल्प संचालक संतोष आळसे, एनएआरपीचे ठोंबरे उपस्थिती होते.