नांदेडमधील सहा कृषी सेवा केंद्रांचे परवाने निलंबित

नांदेड ः परराज्यातून, तसेच अन्य जिल्ह्यातून कीटकनाशकांची खरेदी उगम प्रमाणपत्राशिवाय केल्याचे आढळून आल्यामुळे नांदेड येथील सहा कृषी सेवा केंद्रांचे कीटकनाशके विक्री परवाने जिल्हा अधीक्षक कृषी अधिकारी आर. बी. चलवदे यांनी मंगळवारी (ता. २१) निलंबित केले आहेत. तपासणी मोहिमेदरम्यान आढळलेला एकूण ८५ लाख रुपये किमतीचा परराज्यांतील कीटकनाशकांचा साठा विक्री बंदचे आदेश देण्यात आले आहेत.

राज्याचे कृषी आयुक्त सच्चिंद्र प्रताप सिंह आणि विभागीय कृषी सहसंचालक तुकाराम जगताप यांनी दिलेल्या निर्देशानुसार बोंड अळीचा वाढता प्रादुर्भाव लक्षात घेऊन शेतकऱ्यांना बोंडअळीच्या नियंत्रणासाठी दर्जेदार कीटकनाशके किफायतशीर किमतीमध्ये मिळवीत या उद्देशाने सर्व गुणवत्ता निरीक्षकांना कृषी निविष्ठा केंद्रांच्या तपासणीचे आदेश देण्यात आले होते.

त्या अनुषंगाने जिल्हा अधीक्षक कृषी अधिकारी आर. बी. चलवदे, जिल्हा कृषी विकास अधिकारी संतोष नादरे यांच्या मार्गदर्शनाखाली विभागीय कृषी सहसंचालक कार्यालय तसेच जिल्हा गुणवत्ता निरीक्षक नितीन देशपांडे, मोहीम अधिकारी अनिल शिरफुले, डी. के. जाधव यांच्या पथकाने कृषी निविष्ठा विक्री केंद्रांची तपासणी केली असता नांदेड येथील सहा कृषी सेवा केंद्रांवर परराज्यांतून तसेच राज्यातील अन्य जिल्ह्यांतून उगम प्रमाणपत्राशिवाय आणण्यात आलेल्या कीटकनाशकांचा साठा असल्याचे आढळून आले.

या प्रकरणी नांदेड येथील नवा मोंढा भागातील मोदी अॅग्री जेनेटीक्स, शिवम एजन्सी, सिद्धिविनायक अॅग्रो एजन्सी, सचिन सीडस कंपनी, व्यंकटेश्वरा अॅग्रो एजन्सीज, साई सीडस अॅण्ड पेस्टीसाईडस यांनी परवान्यामध्ये समाविष्ट न करता खरेदी केल्याचे आढळून आले आहे.