नाशिक जिल्ह्यात हलका मध्यम पाऊस

नाशिक : नाशिक जिल्ह्यात पावसाने रविवारी (ता.२४) काही ठिकाणी हजेरी लावली तर काही ठिकाणी उघडीप दिल्याची परिस्थिती होती. जिल्ह्यात इगतपुरी, घोटी परिसरासह त्र्यंबकेश्वर, येवला येथे पावसाने हजेरी लावली. तर सटाणा, कळवण, मालेगाव तालुक्यांत विश्रांती घेतली होती.

इगतपुरीत बळिराजा सुखावला :  घोटी, इगतपुरी तालुक्यांत गेल्या काही दिवसांपासून दडून बसलेल्या पावसाला रविवारी (ता. २४) दुपारपासून सुरवात झाली. हा पाऊस दमदार नसला तरी रिपरिप असल्याने वातावरणात काहीसा गारवा निर्माण झाला होता. जिल्ह्यात सर्वाधिक पावसाचा भाग समजल्या जाणाऱ्या इगतपुरी तालुक्यात पावसाने काही अंशी दडी मारली होती. भाताची पेरणी केलेल्या शेतकऱ्यांची प्रतीक्षा या दमदार पावसाने  संपली आहे.  

त्र्यंबकला पर्यटक भिजले : त्र्यंबकेश्वर : येथे पावसाची रिपरिप सुरू झाली असून, रविवारी (ता. २४) पर्यटनास आलेल्या भाविकांमुळे शहर फुलले होते. त्र्यंबकेश्वरला दुपारनंतर पावसाचे आगमन झाले. दरम्यान, या पावसाने मंदिराच्या पूर्वदरवाजास असलेला कापडी मंडप पडला आहे. त्यामुळे भाविकांना पूर्वीप्रमाणे उत्तर दरवाजाने प्रवेश देण्यात येत आहे. या मार्गावर परिसरातील आदिवासी बांधवांनी पर्यटकांना खाद्यपदार्थ पुरविण्यासाठी झाडांच्या पानांपासून साकारलेले शेड तयार केले आहेत.

येवल्यात शिडकावा : येवला : दोन दिवसांपूर्वी प्रवेशकर्ते झालेल्या आर्द्राने जोरदार सलामी दिली आहे. शुक्रवारपासून (ता. २२) सुरू झालेल्या पावसाने शनिवारी आणि रविवारी रिपरिप सुरूच ठेवली होती. रविवारी अधूनमधून ढगांचा गडगडाट होताना दुपारनंतर येवला शहर व तालुक्यात पावसाने शिडकावा केला. येवला तालुक्याच्या ग्रामीण भागातील अंदरसूल, मुखेड, पाटोदा परिसरासह सर्वदूर या पावसाने हजेरी लावली. या पावसामुळे रखडलेले खरिपाचे चक्र वेगाने पुढे सरकण्यास मदत होणार आहे. तसेच ओस पडलेली बि-बियाण्यांची दुकाने पुन्हा गजबजू लागली आहेत.