कोल्हापूर जिल्हा बॅंकेची सेवा सोसायट्यांमार्फत कर्जवसुली सुरू

कोल्हापूर : जिल्ह्यात थेट वसुलीपेक्षा संस्थांच्या पातळीवरच पीककर्ज असल्याने उसाच्या बिलातून थेट वसुली होत आहे. ज्या कारखान्यांची बिले अडकली आहेत, त्यांची वसुली अद्याप झाली नसली, तरी वसुलीसाठी जिल्हा बॅंकेने कुठेच फारसा तगादा लावला नसल्याची स्थिती आहे.   कोल्हापूर जिल्ह्यात जिल्हा बॅंकेच्या सोसाट्यांमार्फत कर्ज दिले जाते. उसाची बिले गेल्यानंतर बिलातूनच कर्जवसुली करण्याची येथील सोसायट्यांची पद्धत आहे. यामुळे ज्यांचा ऊस गेला आहे. त्या शेतकऱ्यांचे कर्ज वजा जाऊनच शेतकऱ्यांच्या हातात उर्वरित रक्कम पडते. यामुळे बॅंकेत रोख रक्कम भरावयाला लागत नाही. परिणामी जिल्हा बॅंकेच्या मार्फत ही फारशी सक्ती केली जात नाही. ज्यांची बिले अद्याप जमा झाली नाहीत, ते शेतकरी मात्र नवे जुने करून कर्जाचे नूतनीकरण करून घेत आहेत. मात्र यासाठीही बॅंकेने सक्ती केली नसल्याचे बॅंकेच्या सूत्रांनी सांगितले. सोसायट्यांच्या मार्फत थकबाकी असणाऱ्या शेतकऱ्यांना सूचना दिल्या जात असल्या तरी सक्ती केली जात नसल्याचे बॅंकेनी सांगितले.  खासगी बॅंकेच्या प्रतिनिधींनी मात्र वसुलीसाठी जोर लावला आहे. खासगी बॅंकेचे कर्मचारी मात्र शेतकऱ्यांकडे कर्जवसुलीसाठी हेलपाटे मारत असल्याचे चित्र आहे. यामुळे इकडून तिकडून पैशाची जुळवाजुळव करून कर्ज भरण्यासाठी शेतकऱ्यांची गडबड सुुरू आहे. अनेक नातेवाइकांनाही काही कालावधीसाठी मदत करण्याची मागणी शेतकऱ्यांच्या पातळीवर केली जात आहे.