धुळे, जळगाव जिल्ह्यात कर्जमाफी अर्जांबाबत चावडीवाचन

जळगाव : ‘छत्रपती शिवाजी शेतकरी सन्मान’ योजनेंतर्गत कर्जमाफीसंबंधी शेतकऱ्यांनी भरलेल्या अर्जांबाबतचे चावडीवाचन धुळे व जळगाव जिल्ह्यातील १४४९ ग्रामपंचायातींत सोमवारी (ता.२) पूर्ण झाले. यात किती आक्षेप आले, किती शेतकरी अर्ज भरू शकले नाहीत याची माहिती आज (मंगळवारी, ता.३) प्राप्त होईल. निवडणुकीची आचारसंहिता सुरू असल्याने जळगाव जिल्ह्यातील १३८ आणि धुळे जिल्ह्यातील ११० ग्रामपंचायतींमध्ये कर्जमाफीच्या अर्जांबाबतचे वाचन झाले नाही. 

 

चावडीवाचन या संकल्पनेंतर्गत महात्मा गांधी जयंती व ग्रामसभेचे औचित्य साधून ग्रामपंचायतींच्या कार्यालयातच सोमवारी कर्जमाफीसाठीच्या अर्जांचे वाचन झाले. ग्रामसेवक, तलाठी, कृषी सहायकांच्या उपस्थितीत हे वाचन झाले. अनेक ठिकाणी राष्ट्रीयीकृत बॅंका, जिल्हा बॅंकेचे काही अधिकारी, कर्मचारीदेखील ग्रामपंचायतींमध्ये उपस्थित होते. १ ते ८ नमुन्यांमध्ये हे वाचन झाले. या नमुन्यांच्या आधारे शासकीय कर्मचाऱ्यांना आपला अहवाल तहसीलदारांच्या अध्यक्षतेखालील तालुका कमिटीकडे दाखल करायचे आहेत.

 

अर्जांचे वाचन करताना शेतकऱ्यांनी भरलेला अर्ज, त्यांचे कर्ज, नाव याबाबत वाचन झाले. कोण वंचित राहिले का, याबाबतची विचारणा शासकीय कर्मचाऱ्यांनी ग्रामसभेत केली. जळगाव जिल्ह्यात १०३९; तर धुळे जिल्ह्यात ४१० ग्रामपंचायतींमध्ये कर्जमाफीच्या अर्जांचे चावडीवाचन झाले.