परभणी ः छत्रपती शिवाजी महाराज शेतकरी सन्मान योजनेअंतर्गत कर्जमाफीसाठी आॅनलाइन अर्ज केलेल्या शेतकरी याद्यांच्या चावडीवाचनास रविवारपासून (ता. १) सुरवात झाली. रविवारी (ता. १) परभणी जिल्ह्यातील १७५ ग्रामपंचायतींमध्ये विशेष ग्रामसभा आयोजित करून चावडीवाचन करण्यात आले असून, आज (सोमवारी, ता. २) उर्वरित ग्रामपंचायींमध्ये चावडीवाचन केले जाणार आहे, अशी माहिती जिल्हा उपनिबंधक (सहकारी संस्था) गणेश पुरी यांनी दिली.
छत्रपती शिवाजी महाराज शेतकरी सन्मान योजनेअंतर्गत कर्जमाफीसाठी जिल्ह्यातील ३ लाख ३४ हजार २४५ शेतकऱ्यांनी आॅनलाइन नोंदणी केली आहे. अर्जदार शेतकऱ्यांपैकी कर्जमाफीसाठी पात्र शेतकऱ्यांची पडताळणी करण्याकरिता गावोगावी विशेष ग्रामसभांचे आयोजन करून याद्याचे चावडीवाचन केले जात आहे. ग्रामसेवक, कृषी सहायक, तलाठी, गट सचिव आदी कर्मचारी याद्याचे वाचन करत आहेत. या ग्रामसभांना शेतकरी मोठ्या संख्येने उपस्थित राहत आहेत.
ग्रामपंचायत कार्यालयामध्ये कर्जमाफीसाठी अर्ज केलेल्या शेतकऱ्यांच्या याद्या लावण्यात आल्या आहेत. रविवारी (ता. १) झरी (ता. परभणी) येथील ग्रामपंचायत कार्यालयामध्ये आयोजित विशेष ग्रामसभेत जिल्हा उपनिबंधक (सहकारी संस्था) गणेश पुरी यांनी कर्जमाफीच्या यादीचे चावडीवाचन केले. या वेळी जिल्हा अग्रणी बॅंकेचे व्यवस्थापक राम खरटमल, बालाजी देशमुख आदी उपस्थित होते.
दरम्यान, जिल्ह्यातील ७०३ ग्रामपंचायतींपैकी निवडणूक असलेल्या ग्रामपंचायती वगळून रविवारीपर्यंत १७५ ग्रामपंचायतींमध्ये कर्जमाफी याद्यांचे चावडीवाचन करण्यात आले. उर्वरित ग्रामपंचायतीमध्ये सोमवारी (ता. २) महात्मा गांधी जयंतीनिमित्त आयोजित विशेष ग्रामसभांमध्ये कर्जमाफी यांद्याचे चावडीवाचन केले जाणार आहे, असे जिल्हा उपनिबंधक गणेश पुरी यांनी सांगितले.