सांगली ः छत्रपती शिवाजी महाराज शेतकरी सन्मान योजनेतंर्गत आतापर्यंत जिल्हा बॅंकेकडील १ लाख ८ हजार शेतकऱ्यांना कर्जमाफीपोटी २२५ कोटी ३० लाख रुपयांचा लाभ देण्यात आला आहे. सातवी ग्रीन लिस्ट पुढील आठवड्यात येण्याचे संकेत मिळत आहेत, अशी माहिती जिल्हा बॅंकेच्या सूत्रांनी दिली.
कर्जमाफी, प्रोत्साहन अनुदान, ओटीएस लाभाच्या एकूण ६ ग्रीन लिस्ट प्रसिद्ध झाल्या आहेत. कर्जमाफी प्रोत्साहन अनुदान ओटीएस पात्र १ लाख ३३ हजार ४४७ शेतकरी आहेत. त्यांना एकूण २९७ कोटी ६४ लाख रुपयांचा लाभ मिळणार आहे. त्यापैकी १ लाख ८ हजार शेतकऱ्यांना प्रत्यक्ष लाभ मिळाला आहे. सहाव्या ग्रीन लिस्टमधील १९ हजार ३०८ शेतकऱ्यांना ३४.८८ कोटी रुपयांचा लाभ मिळाला. कर्जमाफीची रक्कम कर्जखात्याला, तर प्रोत्साहन अनुदानाची रक्कम लाभार्थी शेतकऱ्यांच्या बचत खात्यावर वर्ग करण्यात आली आहे.
दरम्यान जिल्ह्यात ६ हजार ९९२ शेतकरी ओटीएससाठी पात्र आहेत. या शेतकऱ्यांनी दीड लाखांवरील थकीत रक्कम ३१ मार्चपर्यंत भरल्यास त्यांना दीड लाखांची कर्जमाफी मिळणार आहे. ही रक्कम ४७ कोटी रुपये आहे. कर्जमाफी योजनेचा मंगळवारी व्हिडिओ कॉन्फरन्सद्वारे आढावा घेण्यात आला.
सांगलीतून जिल्हा उपनिबंधक (सहकारी संस्था) प्रकाश अष्टेकर, जिल्हा बॅंकेचे व्यवस्थापक सुधीर काटे तसेच राष्ट्रीयकृत बॅंकांच्या प्रतिनिधींनी यात सहभाग घेतला. राज्यातील ३० हजार शेतकऱ्यांची सातवी ग्रीन लिस्ट पुढील आठवड्यात येईल, असे संकेत मिळत आहेत. जिल्ह्यातील आणखी एक हजार शेतकऱ्यांना लाभ मिळेल, अशी शक्यता वर्तवली जात आहे.