राज्य सरकारचे धोरण शेतकरी हिताचे ः जानकर

उस्मानाबाद  : राज्य सरकारचे धोरण शेतकऱ्यांच्या हिताचे आहे. कर्जमाफी निर्णयाच्या अंमलबजावणीने राज्यातील शेतकऱ्यांना सरकारने दिवाळीची भेट दिली आहे. जिल्ह्यातील पात्र शेतकऱ्यांना ऑक्‍टोबरअखेरपर्यंत कर्जमाफीचा लाभ मिळेल, असा विश्वास पशुसंवर्धन, दुग्धविकास, मत्स्यव्यवसायमंत्री महादेव जानकर यांनी व्यक्त केला.

राज्यात बुधवारपासून कर्जमाफीच्या निर्णयाची अंमलबजावणी सुरू झाली. त्यानिमित्त येथील जिल्हाधिकारी कार्यालयाच्या सभागृहात प्रातिनिधिक स्वरूपात काही शेतकऱ्यांना श्री. जानकर यांच्या हस्ते कर्जमाफीच्या प्रमाणपत्रांचे वितरण झाले. त्या वेळी ते बोलत होते. आमदार सुजितसिंह ठाकूर, भाजपचे जिल्हाध्यक्ष दत्ता कुलकर्णी, जिल्हाधिकारी राधाकृष्ण गमे, प्रभारी मुख्य कार्यकारी अधिकारी अनुप शेंगूलवार, जिल्हा उपनिबंधक व्ही. एस. जगदाळे, जिल्हा अधीक्षक कृषी अधिकारी सुभाष चोले आदी उपस्थित होते.जिल्ह्यातील पात्र लाभार्थ्यांपैकी २३ लाभार्थी शेतकरी कुटुंबांना कर्जमाफी प्रमाणपत्राचे वाटप झाले.

शासनातर्फे शेतकऱ्यांसाठीची ही सर्वात मोठी कर्जमाफी आहे. शेतकऱ्यांचे दीड लाखांपर्यंतचे कर्ज माफ झाले आहे. उस्मानाबाद जिल्ह्यातील एकूण १ लाख ३९ हजार ५७७ शेतकऱ्यांनी ऑनलाइन फॉर्म भरलेले असून पात्र सर्व शेतकऱ्यांना ऑक्‍टोबरअखेरपर्यंत कर्जमुक्‍ती देण्यात येणार असल्याचा विश्वास मंत्री जानकर यांनी व्यक्त केला.

लाभार्थी शेतकरी असे ः उस्मानाबाद तालुका- चनबस शिवय्या कपाळे (रा. बावी), भारत तात्या तांबे (रा. बावी).  तुळजापूर ः नागनाथ गुंड (रा. सुरतगाव), चंद्रकांत शेनमारे (रा. पिंपळा बु.), भीमा आंबुरे (रा. सुरतगाव). लोहारा ः तुकाराम साठे (रा. माकणी), शिवाजी करदुरे (रा. माकणी), रहेमान पठाण (रा. माकणी). कळंब ः शरद सावंत (रा. सौंदाणा ढोकी), नारायण कुलकर्णी (रा. सातेफळ), शिवहरी शेळके (रा. भोसा). वाशी ः गोरोबा तावरे (रा. जिन्नर), राजेंद्र शिंदे (रा. बावी), प्रताप घुले, (रा. वाशी). भूम ः दत्तात्रय चव्हाण (रा. वालवड). परंडा ः भास्कर तनपुरे (रा. खासापुरी), विक्रम देशमुख (रा. खासापुरी), सुरेश बारसकर (रा. अंदोरी).