पीकविमा वाटपाच्या आश्‍वासनानंतर उघडले बॅंकेचे कुलूप

कुंभार पिंपळगाव, जि. जालना : पीकविम्याचे पैसे उद्यापासून (ता. १९) वाटप करण्यात येतील, असे आश्‍वासन दिल्यानंतर स्थानिक जिल्हा बॅंक शाखेला शेतकऱ्यांनी लावलेले कुलूप उघडण्यात आले.

मागील अनेक दिवसांपासून शेतकरी पीकविम्याच्या पैशांची वाट पाहत होते. दहा दिवसांपूर्वी पीकविमा बॅंकेत जमा झाला. मात्र जमा झालेल्या विम्याचे पैसे वाटप करण्यास विलंब होत असल्याच्या कारणाने शेतकरी संतप्त झाले होते. संतप्त झालेल्या शेतकऱ्यांनी सोमवारी (ता. १८) जिल्हा बॅंकेच्या शाखेस कुलूप ठोकले. शाखा अधिकारी विजय कंटुले यांनी मंगळवारपासून पीकविम्याची रक्कम वाटप करण्यात येईल, असे आश्वासन दिल्याने दुपारी कुलूप उघडण्यात आले.

जिल्हा बॅंकेच्या शाखेत गतवर्षी खरीप हंगामात १३ हजार शेतकऱ्यांनी एक कोटी दहा लाख रुपयांचा पीक विमा भरला होता. नैसर्गिक संकटामुळे सर्वच पिके हातची गेली. शेतकऱ्यांना पीकविम्याची चांगली रक्कम मिळेल, अशी आशा होती मात्र तुटपुंजी रक्कम मिळाली. दहा दिवसांपूर्वी ११ हजार शेतकऱ्यांचा चार कोटी ५०लाख रूपयांचा विमा बॅंकेत जमा झाला; मात्र हे पैसे वाटप करण्यास उशीर होत असल्याने संतप्त झालेल्या बापूसाहेब आर्दड, कुंडलिक आर्दड यांच्यासह अनेक शेतकऱ्यांनी बॅंकेला सकाळी कुलूप ठोकले. दरम्यान, मंगळवारपासून ए ते झेड या इंग्रजी अक्षरांप्रमाणे गावनिहाय रक्कम वाटप केली जाईल, असे सांगितल्याने दुपारी कुलूप उघडण्यात आले.