शिर्डी लोकसभा निवडणुकीसाठी वीस उमेदवार रिंगणात

नगर   : नगर लोकसभा मतदारसंघात मंगळवारी मतदान पार पडल्यानंतर आता शिर्डी लोकसभा मतदारसंघाकडे जिल्ह्याचे लक्ष लागले आहे. या मतदारसंघात एकूण २० उमेदवार रिंगणात आहेत. या मतदारसंघात मोठा प्रभाव असलेले विधानसभेतील विरोधी पक्ष नेते राधाकृष्ण विखे पाटील यांची भूमिका काय असेल याकडे लक्ष लागले आहे.

नगर लोकसभा मतदारसंघात मंगळवारी (ता. २३) मतदान पार पडले. जिल्ह्यातील शिर्डी मतदारसंघात सोमवारी (ता. २९) मतदान होत आहे. या मतदारसंघात सदाशिव लोखंडे (शिवसेना), भाऊसाहेब कांबळे (काॅँग्रेस), बन्सी सातपुते (भाकप), सुरेश जगधने (बसप), अशोक जाधव (राष्ट्रीय मराठा पक्ष), प्रकाश आहेर (बहुजन रिपब्लिकन सोशालिस्ट पक्ष), विजय घाटे (रिपब्लिकन बहुजन सेना), संजय सुखदान (वंचित बहुजन आघाडी), गोविंद अमोलिक (अपक्ष), अशोक वाकचौरे (अपक्ष), किशोर रोकडे (अपक्ष), गणपत मोरे (अपक्ष), प्रदीप सरोदे (अपक्ष), बापू रणधीर (अपक्ष), शंकर बोरगे (अपक्ष), भाऊसाहेब जयराम वाकचौरे (अपक्ष), भाऊसाहेब राजाराम वाकचौरे (अपक्ष), सचिन गवांदे (अपक्ष), सुभाष त्रिभुवन (अपक्ष), संपत समिंदर (अपक्ष) असे वीस उमेदवार रिंगणात आहेत. 

येथे शिवसेनेचे खासदार सदाशिव लोखंडे, काॅँग्रेसचे आमदार भाऊसाहेब कांबळे यांच्यासह भाजपतून बंडखोरी केलेले माजी खासदार भाऊसाहेब वाकचौरे अपक्ष लढत आहेत. वाकचौरे यांनी चांगला जोर लावला असल्याने तिंरगी लढत होण्याची शक्यता आहे. विरोधीपक्ष नेते राधाकृष्ण विखे पाटील यांचे चिरंजीव दक्षिण नगरमधून भाजपकडून निवडणूक लढत आहेत. विखे यांनीही सुजय यांच्यासाठी भाजपला मते मिळावीत यासाठी प्रयत्न केले आहेत. विखे यांचा शिर्डी मतदारसंघात मोठा प्रभाव असून त्यामुळे त्यांच्या भूमिकेकडे लोकांचे लक्ष लागले आहे. मात्र, भाऊसाहेब वाकचौरे यांच्या बंडखोरीचा शिवसेनेला मोठा फटका बसण्याची शक्यता व्यक्त केली जात आहे.