औरंगाबाद लोकसभा मतदारसंघातील प्रचार शिगेला

औरंगाबाद लोकसभा मतदारसंघातील प्रचार शिगेला
औरंगाबाद लोकसभा मतदारसंघातील प्रचार शिगेला

औरंगाबाद : औरंगाबाद लोकसभा मतदारसंघातील निवडणुकीचा प्रचार शिगेला पोहोचला आहे. दिग्गजांच्या सभांनी राजकीय वातावरण ढवळून निघाले असताना निवडून येण्यामागच्या समीकरणांची चर्चा रंगू लागली आहे. यंदा दुष्काळाची तीव्रता सर्वाधिक जाणवत असलेल्या औरंगाबाद लोकसभा मतदारसंघात औरंगाबाद पूर्व, मध्य आणि पश्‍चिम विधानसभा मतदारसंघ हे शहरी; तर कन्नड-सोयगाव, गंगापूर-खुलताबाद, वैजापूर हे मतदासंघ ग्रामीण भागाचा मोठ्या प्रमाणात समावेश असलेले विधानसभा मतदारसंघ येतात. औरंगाबाद लोकसभा मतदारसंघात एकूण १८ लाख ५७ हजार ६४५ मतदार आपल्या मतदानाचा हक्‍क या निवडणुकीत बजावणार आहेत.  शिवसेना-भाजप, रासप, रिपाइं (आ.) युतीच्यावतीने विद्यमान खासदार चंद्रकांत खैरे निवडणुकीच्या रिंगणात आहेत. दुसरीकडे काँग्रेस-राष्ट्रवादी काँग्रेस आघाडीच्यावतीने आमदार सुभाष झांबड, वंचित बहुजन आघाडीच्यावतीने आमदार इम्तियाज जलील, तर अपक्ष म्हणून हर्षवर्धन जाधव निवडणुकीच्या रिंगणात उतरले आहेत. या प्रमुख चर्चेतील उमेदवारांशिवाय इतर १९ मिळून २३ उमेदवार या निवडणुकीत आपले भाग्य आजमावीत आहेत.  दिग्गजांच्या सभांनी औरंगाबाद लोकसभा मतदारसंघातील निवडणुकीत चांगलीच रंगत आणली आहे. मुख्यमंत्री देवेंद्र फडणवीस, शिवसेनेचे अध्यक्ष उद्धव ठाकरे यांच्या उपस्थितीत औरंगाबादेत महायुतीचा मेळावा झाल्यानंतर निवडणुकीच्या वातावरणाने जोर धरला. युतीच्यावतीने मुख्यमंत्री फडणवीस, आदित्य ठाकरे यांच्या सभा झाल्या आहेत. दुसरीकडे वंचित आघाडीचे असदुद्दीन ओवेसी दोन दिवसांपासून औरंगाबाद शहरात तळ ठोकून आहेत. शुक्रवारी (ता. १९) सायंकाळी औरंगाबादेत शिवसेनेच अध्यक्ष उद्धव ठाकरे यांची, तर वंचित बहुजन आघाडीच्यावतीने ॲड. बाळासाहेब आंबेडकर व असदुद्दीन ओवेसी यांची संयुक्‍त सभा होत आहे. या सभांकडेही सर्वांचे लक्ष लागले आहे.  आरोप- प्रत्यारोपांच्या फैरी झडत असताना कोणता मुद्दा यावेळच्या निवडणुकीत जास्त परिणाम करणार याच्याही चर्चा रंगू लागल्या आहेत. प्रचाराला दोन दिवस बाकी असतानाच प्रमुख राजकीय पक्षांकडून दिग्गज नेत्यांच्या सभांचे आयोजन करण्याचेही नियोजन केले गेले आहे. येत्या २३ एप्रिलला औरंगाबाद लोकसभा मतदारसंघासाठी प्रत्यक्ष मतदान होणार आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com