पीककापणी प्रयोग प्रकरणी आंदोलकांसोबत आयुक्तांची चर्चा

पुणे : शेतकऱ्यांच्या पिकांचे खोटे पीककापणी प्रयोग प्रकरणी सांख्यिकी विभागाविरोधात उपोषणाला बसलेल्या शेतकऱ्यांना आंदोलन मागे घेण्याचे आवाहन कृषी आयुक्तांनी चर्चेत केले. मात्र, कोणतीही कारवाई होत नसल्याने उपोषण सोडण्यास शेतकऱ्यांनी नकार दिला.  पीककापणी प्रयोगात कृषी सांख्यिकी विभाग हेराफेरी करीत असल्याचे परभणीतील शेतकऱ्यांनी पुराव्यासह निदर्शनास आणले आहे. भ्रष्ट अधिकाऱ्यांवर कारवाई आणि न्याय मिळावा या मागणीसाठी कृषी आयुक्तालयासमोर परभणीतील शेतकरी उपोषण करत आहेत. कृषी आयुक्त सच्चिंद्र प्रताप सिंह यांनी या शेतकऱ्यांना आपल्या दालनात बोलावून सर्व प्रश्न समजावून घेतले. आयुक्तांनी इतर सर्व कामकाज रद्द करून तीन तास शेतकऱ्यांशी चर्चा केली. चर्चेत शेतकरी संघटनेचे नेते कालिदास आपेट, गणेश जोगदंड पाटील, माउली कदम, शिवाजी ब्रुद्रुक, विश्वंभर गोरवे, किसनराव मुलगीर, श्रीनिवास देशमुख, विठ्ठलराव घाडगे, संदीप काळदाते यांनी सहभाग घेतला.  ‘‘पीककापणी प्रयोगात झालेल्या घोटाळ्यांबाबत आयुक्तांशी अतिशय सकारात्मक चर्चा झाली. कृषी विभागाची भूमिका चुकल्याचे त्यांच्या लक्षात आले असून, शेतकऱ्यांवर अन्याय झाल्याचे त्यांनी मान्य केले. शेतकरी पीकविम्यासाठी जोखीमस्तराच्या दोन टक्के हप्ता भरतात. उर्वरित हप्ता अनुदान केंद्र व राज्य शासन देते. हे अनुदान कंपन्यांच्या खिशात घालण्याचे काम चोखपणे सांख्यिकी विभाग करीत असल्याचे आम्ही चर्चेत स्पष्ट केले,’’ असे कालिदास आपेट यांनी सांगितले. या राज्यात शेतकऱ्यांच्या नावाखाली पीकविमा कंपन्यांनी आपल्याच अधिकाऱ्यांच्या माध्यमातून धंदा मांडला आहे. आम्हाला एक तरी असे वर्ष दाखवा की विमा हप्ता आम्ही १००० कोटी भरला आणि वाटप मात्र १२०० कोटीचे झाले. कंपन्यांच्या भल्यासाठी ही योजना राबविली जात असल्याचे सिद्ध न झाल्यास आम्ही आंदोलन मागे घेऊ, असे आंदोलनकांनी स्पष्ट केले. आयुक्तांनी शेतकऱ्यांची बाजू ऐकून घेत विविध विभागांना तातडीने सूचना दिल्या. ‘‘मी शेतकऱ्यांच्या बाजूने आहे. तुमचा फायदा करण्यासाठी मी प्रयत्नशील राहील. माझ्या शब्दावर तुम्ही उपोषण मागे घ्या,’’ असे आवाहन आयुक्तांनी केले.     दरम्यान, मुख्य आंदोलक गणेश जोगदंड पाटील व माउली कदम यांनी चर्चेनंतर सांगितले, की शेतकऱ्यांचा तळतळाट घेणाऱ्या अधिकाऱ्यांवर कारवाई आणि आम्हाला विमा भरपाई मिळत नाही तोपर्यंत आंदोलन सुरूच ठेवले जाणार आहे.