‘माफसू’ची कुलगरू निवड प्रक्रिया २४ डिसेंबरला

नागपूर ः महाराष्ट्र पशु व मत्स्य विज्ञान विद्यापीठाकरीता नव्या कुलगुरुची निवड प्रक्रिया आता २४ डिसेंबर रोजी होणार आहे. २४ डिसेंबर रोजी निवड समितीकडून मुलाखती झाल्यानंतर दुसऱ्याच दिवशी (ता. २५) यातील पाच जणांच्या मुलाखतीची प्रक्रिया राज्यपालांसमोर पार पडणार आहे. त्यानंतर सायंकाळपर्यंत कुलगुरूचे नाव जाहीर होईल, असे सूत्रांनी सांगीतले.  राज्याचा आवाका असलेल्या महाराष्ट्र पशु व मत्स्य विज्ञान विद्यापीठाकरिता कुलगुरू निवडीची प्रक्रिया रहस्यमय टप्प्यातून जात आहे. सप्टेंबर महिन्यातच या विद्यापीठाचे तत्कालीन कुलगुरू डॉ. आदित्यकुमार मिश्रा यांचा कार्यकाळ संपला होता. त्यानंतर नव्या कुलगुरूच्या निवडीसाठीच्या हालचालींना वेग आला. परंतु तीन महिन्यांत ही प्रक्रिया पुढे सरकलीच नाही. त्यामागे विदर्भातील व्यक्‍ती या पदावर असावा असा अट्टहास हे कारण असल्याची चर्चा रंगली आहे. त्यामुळेच तीन डिसेंबरला होणाऱ्या प्रक्रियेकरिता १५ जणांना निवड समितीने मुलाखतीकरिता ईमेलच्या माध्यमातून पाचारण केले होते.  मात्र, एेनवेळी ही प्रक्रिया पुढे ढकलण्यात आल्याचे उमेदवारांना कळविण्यात आले. त्यानंतर ११ डिसेंबर रोजी ही निवड प्रक्रिया होणार असल्याचा ई-मेल उमेदवारांना मिळाला. त्यानुसार उमेदवार पुन्हा तयारीला लागले. मात्र ११ डिसेंबरचा मुहूर्त देखील टळला असून आता या प्रक्रियेकरिता २४ डिसेंबरची तारीख निश्‍चित करण्यात आली आहे. २४ डिसेंबरला उमेदवारांनी निवड  समितीसमोर सादरीकरण करावे. त्यातील पाच जणांची नावे अंतिम करून ती राज्यपालांना पाठविली जाणार आहेत. त्यानंतर दुसऱ्याच दिवशी तडकाफडकी राज्यपाल देखील या पाच जणांच्या मुलाखती घेऊन सायंकाळपर्यंत कुलगुरूच्या नावावर शिक्‍कामोर्तब करतील, असे सूत्र सांगतात.  दोन उमेदवारांमध्ये झाली वाढ पूर्वी कुलगुरू पदासाठी इच्छुकांच्या यादीत केवळ १५ जणांचा समावेश होता. ३ डिसेंबरपर्यंत १५ जणांच्या नावाची चर्चा असताना आता १७ जणांची नावे असल्याचे सूत्र सांगतात. त्यामुळे एेनवेळी कोणाची आणि कशी नावे वाढली याविषयी गूढ वाढीस लागले आहे.