माफसूला जागतिक स्तरावर लौकिक मिळवून देणार

नागपूर : पदभरती, ॲक्रीडेशन यासारखी आव्हाने विद्यापीठासमोर आहेत. त्या आव्हानांवर सर्वांच्या सहकार्याने मात करीत विद्यापीठाला जागतीक स्तरावर लौकीक मिळवून देण्याचा प्रयत्न करणार असल्याची ग्वाही माफसूचे कुलगुरू डॉ. आशिष पातूरकर यांनी दिली.

प्रभारी कुलगूरू तसेच नागपूर विभागीय आयुक्‍त अनुपकूमार यांच्याकडून त्यांनी सोमवारी (ता.२२) पदभार स्वीकारला. त्यानंतर आयोजित कार्यक्रमात त्यांनी महाराष्ट्र पशु व मत्स्य विज्ञान विद्यापीठाचे अधिकारी, कर्मचारी यांच्याशी संवाद साधला.

समाजातील प्रत्येक घटकापर्यंत माफसूची सकारात्मक प्रतिमा गेली पाहिजे. त्याकरीता सर्वांनी सामूहिक प्रयत्न करावे. राज्यातील सर्व पशुपालकांपर्यंत विद्यापीठ निर्मित आधुनिक तंत्रज्ञान येत्या काळात नक्‍की पोचेल, असेही ते म्हणाले. प्रभारी कुलगुरू अनुपकूमार यांनी सुध्दा समाजातील शेवटच्या घटकापर्यंत विद्यापीठाचे कार्य पोचणे गरजेचे असल्याचे सांगितले. विद्यापीठाचे कार्य शिक्षणापूरतेच मर्यादीत न राहता संशोधन आणि त्याच्या विस्तार कार्यावर देखील भर देणे क्रमप्राप्त असल्याचे अनुपकुमार म्हणाले. देशी गाईचे संगोपन व संरक्षण करून उत्पादकता वाढविणे गरजेचे असून सदरच्या प्रकल्पाबाबत मी स्वतः यापुढे पाठपुरावा करून सर्व प्रकारची मदत विद्यापीठास करण्याबाबत सदैव तत्पर राहणार असल्याचे ते म्हणाले.

या माध्यमातून ग्रामीण भागातील जनतेचे उत्पन्न वाढविण्यास सहाय्य होणार आहे. यावेळी संशोधन संचालक डॉ. ए.एस. बन्नाळीकर, विस्तार शिक्षण संचालक डॉ. ए.पी. सोमकुंवर, अधिष्ठाता निम्न शिक्षण डॉ. एन.एन. झाडे, कुलसचिव एन.के. लोणकर, नियंत्रक डी.बी. राऊत, विद्यापीठ अभियंता व्ही.सी. वैद्य, विद्यापीठ ग्रंथपाल एस.एन. गावंडे, शिक्षक व शिक्षकेत्तर कर्मचारी यावेळी उपस्थित होते.