केळी, टोमॅटो, भाजीपाला अफगाणिस्तानला निर्यातीची संधी

मुंबई  : काही दिवसांपूर्वी सुरू झालेल्या मुंबई ते काबूल थेट कार्गो सेवेमुळे महाराष्ट्रातील केळी, टोमॅटो आणि हिरवा भाजीपाला अफगाणिस्तानात पाठविला जात आहे. तेथे त्याला मोठी मागणी असून तेथील फळे, सुकामेवादेखील राज्यात उपलब्ध होणार आहे, असे कृषिमंत्री पांडुरंग फुंडकर यांनी सांगितले. अफगाणिस्तानचे मुंबईतील वाणिज्यदूत मोहंमद झिया सालेही यांच्या नेतृत्वाखालील शिष्टमंडळाने कृषिमंत्र्यांची मंत्रालयात भेट घेतली. या वेळी कृषी विभागाचे प्रधान सचिव विजयकुमार उपस्थित होते. मुंबई-काबूल थेट कार्गो सेवेमुळे मालाची वाहतूक व्यवस्था सुरळीत होण्यासाठी या बैठकीत चर्चा करण्यात आली. महाराष्ट्रातील उत्तम दर्जाच्या फळांना तसेच भाजीपाल्यास अफगाणिस्तानमध्ये मोठ्या प्रमाणावर मागणी आहे. राज्यातून टोमॅटो, केळी, भाजीपाला येथून काबूलला पाठविला जात आहे. सध्या आठवड्यातून एकदा कार्गोद्वारे माल पाठविला जात आहे. पहिल्या फेरीत महाराष्ट्रातून ४० टन माल पाठविला त्यात २० टन केळी, १० टन टोमॅटो आणि भाजीपाला होता. महाराष्ट्रातील शेळी-मेंढीचे मटन, मासे, अंडी, दुग्धजन्य पदार्थ यांना अफगाणिस्तानमध्ये मोठ्या प्रमाणावर मागणी आहे. या कार्गो सेवेमुळे अफगाणिस्तानामधील फळे, सुकामेवा देखील राज्यात उपलब्ध होणार आहे. वाशी येथील बाजार समितीच्या आवारात अफगाणिस्तानच्या फळे आणि सुकामेव्याच्या दुकानासाठी जागा उपलब्ध करून दिली जाणार आहे. या कार्गोसेवेचा उपयोग महाराष्ट्रातील भाजीपाला, फळे, मासे, सेंद्रिय शेतीतील उत्पादने रशियामध्ये पाठविण्यासाठी सुद्धा होणार आहे.  तेथील बाजारपेठेत शेतमालास संधी उपलब्ध होणार असल्याचे कृषिमंत्र्यांनी या वेळी सांगितले. अफगाणिस्तानातील शेतकऱ्यांना कुशल शेतीसाठी मार्गदर्शन करण्यासाठी महाराष्ट्रातील प्रगिशील शेतकरी, तज्ज्ञ तसेच गुंतवणूकदारांना पाठवावे, अशी मागणी शिष्टमंडळाने या वेळी केली.