‘बोंड अळी व्यवस्थापनाचा महाराष्ट्र पॅटर्न निर्माण व्हावा’

परभणी : कपाशीवरील गुलाबी बोंड अळीच्या व्यवस्थापनासाठी या किडींच्या अचूक सर्वेक्षणास विशेष महत्त्व आहे. कीड-रोग सर्वेक्षण प्रकल्पाच्या (क्रॉपसॅप) माध्यमातून गुलाबी बोंड अळी व्यवस्थापनाचा महाराष्ट्र पॅटर्न निर्माण करण्यासाठी सर्वांनी प्रयत्न करणे आवश्‍यक आहे, असे प्रतिपादन वसंतराव नाईक मराठवाडा कृषी विद्यापीठाचे विस्तार शिक्षण संचालक डॉ. प्रदीप इंगोले यांनी केले.

वसंतराव नाईक मराठवाडा कृषी विद्यापीठातील कृषी कीटकशास्त्र विभाग आणि राज्य शासनाच्या कृषी विभागातर्फे कापूस, सोयाबीन, तूर, हरभरा पिकांवरील कीड-रोग व्यवस्थापन, सर्वेक्षण व सल्ला प्रकल्प (क्रॉपसॅप) अंतर्गत मराठवाडा विभागातील जिल्हा अधीक्षक कृषी अधिकारी, उपविभागीय कृषी अधिकारी, तालुका कृषी अधिकारी, विद्यापीठांतील जिल्हा समन्वयक, मास्टर ट्रेनर्स यांच्यासाठी सोमवारी (ता. १८) आणि मंगळवारी (ता.१९) प्रशिक्षणाचे आयोजन करण्यात आले होते. या वेळी अध्यक्षस्थानी डॉ. प्रदीप इंगोले होते. संशोधन संचालक डॉ. दत्तप्रसाद वासकर, लातूर विभागीय कृषी सहसंचालक रमेश भताने, कीटकशास्त्र विभाग प्रमुख डॉ. पुरुषोत्तम झंवर, जिल्हा अधीक्षक कृषी अधिकारी बाळासाहेब शिंदे आदी उपस्थित होते.

डॉ. इंगोले म्हणाले, की कीड व रोगाचा प्रादुर्भाव अचूक सर्वेक्षणाने ओळखून वेळीच उपाय योजनेबाबत शेतकऱ्यांना माहिती द्यावी. बोंड अळी व्यवस्थापनासाठी कामगंध सापळ्यांचा प्रभावी वापर करावा.

श्री. भताने म्हणाले, की क्रॉपसॅप प्रकल्पाचे स्वरूप बदलेले आहे. कृषी सहायक, कृषी पर्यवेक्षक, मंडळ कृषी अधिकारी यांनी कीड- रोग सर्वेक्षणाचे काम जबाबदारीने करावे. या वेळी प्रास्ताविक करून डॉ. झंवर यांनी गुलाबी बोंड अळीचे व्यवस्थापनाबाबत माहिती दिली. डॉ. बस्वराज भेदे यांनी सोयाबीन वरील कीड व्यवस्थापन, डॉ. अनंत बडगुजर यांनी किडींच्या सर्वेक्षण पद्धती, डॉ. एस. डी. बंटेवाड यांनी तुरीवरील कीड तर डॉ. घंटे यांनी रोग व्यवस्थापनावर माहिती दिली. सूत्रसंचालन डॉ. अनंत बडगुजर यांनी केले. या प्रशिक्षणात मराठवाड्यातील २०० कृषी अधिकारी, कर्मचारी सहभागी झाले होते.