राज्यात कापूस, तूर उत्पादनात यंदा मोठी घट

मुंबई : राज्यात झालेला अनियमित पावसाने परत एकदा पीक नुकसान करत शेतीला मोठा धक्का दिला आहे. पावसाच्या मोठ्या खंडामुळे पिकांचे नुकसान झाल्याने राज्य सरकारला दुसऱ्या सुधारित अंदाजात पीक उत्पादनात मोठी घट होणार असल्याचे जाहीर करावे लागले. सरकारने नुकत्याच जाहीर केलेल्या दुसऱ्या सुधारित अंदाजात कापसाच्या उत्पादनात ४३ टक्के, तर तुरीचे उत्पादन तब्बल ५२ टक्के कमी होणार असल्याचे स्पष्ट केले.

महाराष्ट्र हे कापूस आणि तूर उत्पादनात देशात आघाडीचे राज्य आहे. मात्र यंदा कापूस पिकावर आलेली बोंड अळी आणि पावसाच्या मोठ्या खंडामुळे तूर पिकावर झालेला परिणाम यामुळे या दोन्ही महत्त्वाच्या पिकांच्या उत्पादनात मोठी घट आली आहे. त्यामुळे २०१७-१८ या वर्षात कापूस उत्पादन मागील वर्षीच्या तुलनेत ४३ टक्के घट होऊन ९.५ दशलक्ष गाठींवरून कमी होऊन केवळ ६ दशलक्ष गाठी होईल असा अंदाज राज्य सरकाने जाहीर केला आहे. यंदाच्या पावसाळ्यात ऐन पिकांच्या वाढीच्या काळात जूनच्या शेवटी ते आॅगस्टपर्यंत पावसाने सतत उघडीप दिली होती. त्याचा फटका पिकांच्या वाढीला बसला. तसेच कापूस काढणीला आल्यानंतर पहिली वेचनी झाली न झाली तोच गुलाबी बोंड अळीने कपाशीवर आक्रमण केले. राज्यभर मोठ्या प्रमाणात बोंड अळी आल्याने उत्पादनावर मोठा परिणाम झाला. त्यामुळे सरकारने कापूस उत्पादनात मोठी घट होणार असल्याचा अंदाज जाहीर केला आहे.

राज्यातील अन्नधान्य उत्पादनातही २०१७-१८ मध्ये मागील वर्षीच्या तुलनेत २५ टक्के घट होऊन १३.३ दशलक्ष टन होणार आहे. मका उत्पादनही यंदा ९ टक्क्यांनी घटून ३.५ दशलक्ष टनांवर स्थिरावणार आहे. तर भात उत्पादनात तब्बल ३१ टक्के घट होऊन २.७ दशलक्ष टन उत्पादन होईल, असे सुधारित अंदाजातून स्पष्ट होते.

तेलबियांमध्ये भुईमूग उत्पादनात ३८ टक्के घट होऊन २ लाख ६० हजार ५०० टन उत्पादन होईल, तर सोयाबीन आणि इतर महत्त्वाच्या तेलबिया पिकांच्या उत्पादनात १६ टक्के घट होऊन ३.९ दशलक्ष टन उत्पादन होईल. मात्र यंदा ऊस उत्पादनात वाढ होणार असल्याचा अंदाज आहे. मागील वर्षी २०१६-१७ मध्ये उसाचे ५०.६ दशलक्ष टन उत्पादन झाले होते तर यंदा ६७.९ दशलक्ष टन उत्पादन होणार असल्याचे सरकारने स्पष्ट केले आहे.