सोलापूर जिल्ह्यात महावितरणची थकबाकी वसुली मोहीम

सोलापूर : जिल्ह्यातील दोन लाख १५ हजार घरगुती, वाणिज्यिक व औद्योगिक थकबाकीदार वीजग्राहकांकडे ३० कोटी २९ लाख रुपयांची थकबाकी आहे. ती थकबाकी न भरल्यास वीजपुरवठा खंडित करण्याचा पवित्रा महावितरणने घेतला आहे.  महावितरणने थकबाकी वसुलीसाठी मोहीमच सुरू केली आहे. या मोहिमेमध्ये सहभागी जिल्ह्यातील जवळपास एक हजार १०० अभियंते, अधिकारी व जनमित्रांशी जुनी मिल कंपाउंडमधील "बिजली भवन'' येथे प्रादेशिक संचालक संजय ताकसांडे यांनी थेट संवाद साधला. या वेळी मुख्य अभियंता नागनाथ इरवाडकर, अधीक्षक अभियंता ज्ञानदेव पडळकर उपस्थित होते. सद्यःस्थितीत वीजबिलाच्या थकबाकीमुळे महावितरणसमोर आर्थिक संकट उभे राहिले आहे.  शून्य थकबाकी मोहिमेत नोव्हेंबर व डिसेंबरमध्ये तसे चांगले काम झाले. परंतु, फेब्रुवारी महिन्यात संपूर्ण थकबाकी वसूल करण्याच्या ध्येयानेच काम करणे आवश्‍यक आहे. थकबाकी असल्यास वीजपुरवठा खंडितच होणार, असा संदेश या मोहिमेद्वारे थकबाकीदारांना द्यावा, ही मोहीम आक्रमकपणे राबविली गेली पाहिजे व थकबाकी पूर्णपणे फेब्रुवारी महिन्यातच वसूल करण्याचे आदेशही ताकसांडे यांनी दिले. तर मुख्य अभियंता नागनाथ इरवाडकर यांनी सोलापूरला वीजबिलांच्या थकबाकीतून मुक्त करण्याचे आवाहन केले.  वीजग्राहकांकडे किती रक्कम थकीत आहे हे न पाहता वीजपुरवठा खंडित करण्यात येणार आहे. आक्रमकपणे सुरू झालेल्या थकबाकी वसुली मोहिमेत अधीक्षक अभियंता, कार्यकारी अभियंता, सर्व उपविभाग व शाखा कार्यालयांचे प्रमुख अभियंते, लेखा अधिकारी तसेच हजारो जनमित्र सहभागी झाले आहेत. वीजपुरवठा खंडित झाल्यानंतर थकीत वीजबिलाचा भरणा करणे, संबंधित कार्यालयात पावती दाखवून, रिकनेक्‍शन चार्जेस भरून वीजपुरवठा सुरू करून घ्यावा लागणार आहे.  याशिवाय तात्पुरता किंवा कायमस्वरूपी वीजपुरवठा खंडित केल्यानंतरही थकबाकीदार अनधिकृतपणे विजेचा वापर करीत असेल, तर त्यांच्याविरुद्ध तत्काळ फौजदारी कारवाई करण्याच्या सूचना दिल्या आहेत. थकीत वीजबिलाचा संबंधित ग्राहकांनी तत्काळ भरणा करावा अन्यथा वीजपुरवठा खंडितच केला जाणार आहे. ही कटू कारवाई टाळण्यासाठी थकीत वीजबिलाचा त्वरित भरणा करून सहकार्य करण्याचे आवाहन महावितरणने केले आहे.