खानदेशातील प्रमुख प्रकल्प होताहेत कोरडे

जळगाव : खानदेशातील अनेक प्रमुख प्रकल्प कोरडे आहेत. त्यातील किरकोळ साठाही जवळपास संपत आला आहे. जळगाव जिल्ह्याच्या पश्‍चिम व दक्षिण भागातील सर्वच प्रमुख मध्यम प्रकल्प आटले आहेत. धुळे जिल्ह्यातही बुराई प्रकल्प कोरडा आहे. मालनगाव, करवंद प्रकल्पातील साठाही कमी आहे.

वाघूर व गिरणा धरणांमध्ये अनुक्रमे ४६ व ४७ टक्के जलसाठा होता. या प्रकल्पांमधून एकदा पिण्याच्या पाण्यासह सिंचनासाठी आवर्तन सुटले आहे. आता दुसऱ्या आवर्तनाची प्रतीक्षा आहे. ते सुटल्यानंतर या प्रकल्पांमधील जलसाठा ३० टक्‍क्‍यांपर्यंतच राहील, अशी माहिती मिळाली. 

जळगाव जिल्ह्यातील पाचोरा, भडगाव, एरंडोल, चाळीसगाव, पारोळा भागातील सर्वच मध्यम प्रकल्प कोरडेठाक होण्याच्या स्थितीत आहेत. अग्नावती व हिवरा प्रकल्पात अनुक्रमे ६३ टक्के व २३ टक्के जलसाठा होता. तोही संपत आला आहे. अंजनी, बोरी, भोकरबारी, बहुळा व मन्याड, जामनेरमधील सर्व लघू तलाव कोरडे आहेत. तोंडापूर प्रकल्पातील पाच टक्के साठाही संपत आला आहे. यावल तालुक्‍यातील मोर प्रकल्पात ५५ टक्के साठा होता. तो ४० टक्‍क्‍यांवर आहे. चोपडा तालुक्‍यातील गूळ प्रकल्पही ५० टक्‍के आहे. तापी नदीवरील हतनूर प्रकल्पात १०० टक्के जलसाठा होता. तो झपाट्याने कमी होऊन ६० टक्‍क्‍यांपर्यंत आला आहे. 

धुळे जिल्ह्यातील पांझरा, करवंद व मालनगाव या प्रकल्पांमध्ये अनुक्रमे १००, ८४ व ९३ टक्के जलसाठा होता. तो आता ५० टक्‍क्‍यांपर्यंत आला आहे. तापी नदीवरील धुळे जिल्ह्यातील सुलवाडे बॅरेजमध्ये चांगला जलसाठा आहे, पण त्याचा उपयोग सिंचनासाठी होत नाही. कारण उपसा सिंचन योजना, पाट कार्यरत नाहीत. नंदुरबार जिल्ह्यातील दरा प्रकल्प कोरडा होत आला आहे. साक्री व नंदुरबारला लाभदायी ठरणाऱ्या बुराई प्रकल्पात साठा नाही. जिल्ह्यातील तापी नदीवरील सारंगखेडा व प्रकाशा बॅरेजमध्ये जलसाठा आहे. परंतु त्यावरही उपसा सिंचन योजना कार्यरत न झाल्याने सिंचनासंबंधीची अडचण कायम आहे, अशी माहिती मिळाली.