खानदेशात तूर खरेदीबाबत ऑफलाइन नोंदणी तातडीने करा

जळगाव ः खानदेशात तूर खरेदीसंबंधी शासकीय केंद्रांमध्ये कार्यवाही सुरू आहे; परंतु नोंदणीच कमी असल्याने खरेदी तोकडी किंवा अत्यल्प झाली आहे. फेब्रुवारीत दर हमीभावापर्यंत होते. यामुळे शेतकऱ्यांनी शासकीय केंद्रात विक्रीसंबंधी नोंदणी टाळली. आता दर दबावात असल्याने शासकीय केंद्रात तूर विक्री करण्याची वेळ आली आहे; परंतु ऑनलाइन नोंदणी असेल तर केंद्रात तूर विक्री करता येते. ही बाब लक्षात घेता ऑफलाइन नोंदणी तातडीने करून शासकीय केंद्रात विक्री करण्याची व्यवस्था शासनाने करावी, असा मुद्दा शेतकरी उपस्थित करीत आहेत. 

जळगाव जिल्ह्यात नऊ, धुळ्यात तीन आणि नंदुरबारात तीन तूर खरेदी केंद्र मंजूर आहेत. जळगावात पाचोरा, चाळीसगाव, जळगाव, मुक्ताईनगर, बोदवड, जामनेर, चोपडा, रावेर, यावल येथे तूर खरेदी केंद्र मंजूर आहेत. २३ फेब्रुवारीपर्यंत ऑनलाइन नोंदणी करून घ्यायची होती. ज्यांनी ही नोंदणी केली, त्यांच्याच तुरीची खरेदी केली जात आहे. परंतु फेब्रुवारीत तूर दर ५६०० रुपयांपर्यंत मुक्ताईनगर, रावेर, अमळनेर व चोपडा येथील बाजारात होते. तर विदर्भातील मलकापूर, नांदुरा भागात दर ५८०० रुपयांपर्यंत होते. नंतर दरांवर दबाव आला. 

मग शेतकऱ्यांनी बाजारात तूर विक्री करणे टाळले. दर वधारतील, अशी अपेक्षा होती, परंतु दर हमीभावापेक्षा ९०० ते १००० रुपयांनी कमीच आहेत. अशा रावेर, पाचोरा, जामनेर, बोदवड, मुक्ताईनगर भागातील अनेक शेतकऱ्यांनी तूर साठविली आहे. आता तूर विक्री करायची आहे, परंतु ती हमीभावापेक्षा कमी दरात कशी करावी, असा मुद्दा आहे. 

शासकीय केंद्रात नोंदणी केलेल्या शेतकऱ्यांनाच तूर विक्री करण्यासंबंधी मोबाईलवर मेसेज आहे. हे मेसेज दाखवा आणि तूर विक्री करा, अशी कार्यवाही शासकीय खरेदीदार करीत आहेत. यामुळे तूर उत्पादक अडचणीत सापडले असून, त्यांच्या तुरीची हमीभावात खरेदी तातडीने व्हावी, यासाठी ऑफलाइन नोंदणी तातडीने करून लागलीच किंवा दोन दिवसांत त्यांच्या तुरीची खरेदी करावी, अशी मागणी शेतकरी करीत आहेत.