मराठा क्रांती मोर्चाची उद्या मंत्रालयावर धडक

औरंगाबाद : मराठा समाजाने वेळोवेळी मांडलेल्या कोणत्याही मागण्या सरकारने पूर्ण केल्या नाहीत. यावर समाजाची भावना लक्षात घेऊन मागण्यांच्या कार्यवाहीचा जाब विचारण्यासाठी मंगळवारी (ता. 14) मंत्रालयावर धडक जाण्याविषयी मराठा क्रांती मोर्चा समन्वयक बैठकीत रविवारी (ता. 12) एकमत झाले. 

सकल मराठा समाज, मराठा क्रांती मोर्चा, पदाधिकारी, समन्वयक मंगळवारी मंत्रालयावर धडकणार आहेत. मंत्रालयातील चर्चेसंदर्भात शहरातील सिंचन भवन येथे पूर्वबैठक पार पडली. बैठकीत सरकारला जाब विचारण्याबाबत चर्चा झाली. मराठा समाजाच्या मागण्यांसंदर्भात मुख्यमंत्र्यांना चार नोव्हेंबर रोजी औरंगाबादेतील क्रांती चौक येथे जाब विचारण्यात येणार होता; परंतु मुख्यमंत्री न आल्यामुळे मराठा क्रांती मोर्चा मुंबईला जाऊन सरकारला जाब विचारेल, अशी प्रतिक्रिया समन्वयकांनी प्रसारमाध्यमांना दिली होती.

दरम्यान, मराठा आरक्षणासंदर्भात शासनाने स्थापन केलेल्या मंत्रिमंडळ उपसमितीचे अध्यक्ष तथा महसूल, सार्वजनिक बांधकाम मंत्री चंद्रकांत पाटील यांनी मराठा क्रांती मोर्चाच्या समन्वयकांना मंगळवारी चर्चेला बोलावले. हा प्रस्ताव आजच्या बैठकीत मान्य करण्यात आला. या चर्चेसाठी प्रत्येक जिल्ह्यातील 5 ते 10 समन्वयकांनी मंगळवारी मंत्रालय, मुंबई येथे उपस्थित राहावे, असे आवाहन मराठा क्रांती मोर्चा, सकल मराठा समाजातर्फे करण्यात आले आहे.