‘मराठा आरक्षणाचा लढा तीव्र करणार’

तुळजापूर, जि. उस्मानाबाद  ः मूक मोर्चाची भाषा सरकारला कळत नाही, ठोक मोर्चा काढल्याशिवाय या शासनाला जाग येत नाही. मंत्रालयात घुसून आरक्षण मिळवू, हिंमत असेल तर मुख्यमंत्र्यांनी अडवून दाखवावे. येत्या आठ दिवसांत आंदोलनाची पुढील दिशा ठरवून आरक्षणाचा लढा तीव्र करण्याचा इशारा मराठा क्रांती मोर्चाच्या कार्यकर्त्यांनी दिला आहे. 

आई तुळजाभवानीच्या दरबारात सरकारच्या धोरणाचा ‘जागरण गोंधळ' करत क्रांती मोर्चाच्या दुसऱ्या पर्वाला सुरवात झाल्याचे शुक्रवारी (ता. २९) कार्यकर्त्यांनी जाहीर केले. मराठा समाजाला आरक्षण मिळावे, यासाठी राज्यात ५८ मूक मोर्चे निघाले. त्यानंतर शासनाने मराठा समाजासाठी विविध घोषणा केल्या. प्रत्यक्षात त्याची अंमलबजावणी झाली नाही.

त्यानंतर आता मूक नव्हे, तर ठोक मोर्चा काढण्याचा निर्णय मराठा क्रांती मोर्चातील समन्वयकांनी घेतला. शुक्रवारी सकाळी ११ वाजता तुळजापूर शहरातील छत्रपती शिवाजी महाराज यांच्या पुतळ्यापासून मोर्चाला सुरवात झाली. तालुक्यासह विविध जिल्ह्यांतील समन्वयक मोर्चात सहभागी झाले होते.