मराठवाड्यात पावसाचा हात आखडताच

औरंगाबाद : मराठवाड्यात पावसाने हात आखडताच घेतला आहे. मराठवाड्यातील ४२१ मंडळातील पावसाच्या दिवसाची आकडेवारी पावसाच्या अनियमिततेचे दर्शन घडविते. त्यामुळे काही ठिकाणी पाऊस येईल या आशेवर पेरणी वा लागवड केलेल्या शेतकऱ्यांच्या नजरा आकाशाकडे लागल्या आहेत. अलीकडच्या तीन ते चार दिवसांत तर पावसाने मराठवाड्याच्या बहुतांश मंडळाकडे पाठच फिरविल्याचे चित्र आहे.

मराठवाड्यातील पावसाच्या दिवसांसदर्भात मंडळनिहाय १ ते २७ दिवसांतील पावसाच्या दिवसाचं रिपोर्टिंग पुन्हा एकदा पाऊस कृपाशील की अवकृपा दाखविणार हा प्रश्न आहे. महारेनवरील आकडेवारीनुसार जालना जिल्ह्यातील बदनापूर तालुक्‍यांतर्गत येत असलेल्या बावणे मंडळात जूनच्या पहिल्या अठरा दिवसांत पावसाची हजेरीच लागली नव्हती. अलीकडच्या दहा दिवसांत जो काही पाऊस पडलाय किंवा ज्या शेतकऱ्यांकडे सिंचनाची थोडीबहुत सोय आहे, अशा बावणे पांगरी येथील शेतकऱ्यांची पिके टिकून आहेत. मात्र, जवळपास ७० टक्‍के शेतकऱ्यांची पावसावरील पिकं पुरेशा पावसाअभावी धोक्‍यात असल्याची माहिती शेतकऱ्यांनी दिली.

जालना जिल्ह्यातील रामनगर, मिरखेडा, भोजपूरी, जळगाव, हडप सावरगाव, भीलपूरी आदी गावशिवारात पावसाची दडी कायम असल्याची माहिती शेतकऱ्यांनी दिली. त्यामुळे त्या भागातील पेरण्याही खोळंबल्या आहेत. पावसाच्या महारेनवरील ४२१ मंडळांपैकी काही मंडळांतील पावसाच्या दिवसानुसार मराठवाड्यातील आठ मंडळांत केवळ दोन दिवस पाऊस पडला. अपेक्षित पावसाच्या तुलनेत पाऊस समाधानकारक वा जास्त दिसत असला तरी प्रत्यक्षात २७ दिवसांत तो पडला किती दिवस यावर त्या त्या भागातील पिकांचं गणित अवलंबून आहे.

दहा दिवसांपूर्वी व अलीकडे चार ते पाच दिवस अगोदरच्या पावसाच्या भरवशावर पिके कशी बशी टिकून आहेत. पाऊस पुरेसा नसण्याचा ३० ते ४० टक्‍के फटका पेरलेल्या पिकांना बसला. सिंचनाची सोय असलेल्यांचीच पिके बरी आहेत. - गणेश शिंदे, बावणे पांगरी, ता. बदनापूर जि. जालना.

ज्यांनी कपाशीची लागवड केली त्या जळू लागल्या. जनावरांसाठीही पाण्याची अबाळं होतेय. तयारी पूर्ण पण पावसाने खोडा घातल्यानं पेरण्या रखडल्यात. - नारायण लहाने, शेतकरी भीलपूरी जि. जालना.