मराठवाड्यात पाणीपुरवठा, स्वच्छता योजनांसाठी १००० कोटी

औरंगाबाद  : मराठवाड्यात पाणीपुरवठा आणि स्वच्छतेच्या योजना राबविण्यासाठी सुमारे १ हजार ४३४  कोटी रुपयांचा निधी देण्यात आला आहे. या निधीच्या माध्यमातून मार्च २०१८ पर्यंत पाणीपुरवठ्याच्या सर्व योजना पूर्ण करण्याचे आदेश पाणीपुरवठा व स्वच्छता विभागाचे मंत्री बबनराव लोणीकर यांनी दिले. जलसंपदा विभागाच्या जिल्हाधिकारी कार्यालयात शुक्रवारी (ता.३) आयोजित विभागस्तरीय आढावा बैठकीत ते बोलत होते. या बैठकीला विभागीय आयुक्त डॉ. पुरुषोत्तम भापकर, जिल्हाधिकारी नवल किशोर राम, जिल्हा परिषदेचे मुख्य कार्यकारी अधिकारी मधुकरराजे अर्दड आदी उपस्थित होते. मुख्यमंत्री पेयजल योजनेच्या माध्यमातून मराठवाड्यासाठी ४६४ कोटी, जलस्वराज्य टप्पा-२ साठी १०९ कोटी, राष्ट्रीय ग्रामीण पेयजल योजनेसाठी ९४ कोटी रुपयांचा निधी वितरीत करण्यात आल्याची माहिती या बैठकीत देण्यात आली. या निधीच्या माध्यमातून करण्यात येणारी सर्व कामे मार्च २०१८ पर्यंत पूर्ण करावयाची आहेत. या कामामध्ये दिरंगाई करणाऱ्या अधिकारी आणि कर्मचाऱ्यांवर कडक कारवाई करण्यात येणार असल्याचेही लोणीकर यांनी सांगितले.  मराठवाड्यात हागणदारीमुक्तीचे काम प्रगतीपथावर असून जालना जिल्हा आघाडीवर आहे. राज्यातील २९००० गांवे हागणदारीमुक्त झाली आहेत. मराठवाड्यासह संपूर्ण महाराष्ट्र मार्च २०१८ पर्यंत हागणदारीमुक्त करावयाचा आहे. शौचालय बांधण्यासाठी महाराष्ट्रात २७७ कोटीचे अनुदान तत्काळ उपलब्ध करून देण्यात येणार आहे. त्यापैकी १२० कोटी मराठवाड्यात देण्यात येणार असल्याचेही श्री. लोणीकर यांनी सागितले. मराठवाड्यातील ज्या जिल्ह्यात कामांना गती नाही अशा, जिल्ह्यातील कामांचा पुढील आठवड्यात विशेष आढावा घेण्यात येईल. सर्व कामे मार्च २०१८ पर्यंत कशा प्रकारे पूर्ण होतील यासाठी विशेष लक्ष देणार असल्याचे विभागीय आयुक्त डॉ. पुरूषोत्तम भापकर  म्हणाले.