हिरज येथे रेशीम कोषाची बाजारपेठ

सोलापूर : राज्यातील रेशीम कोष उत्पादक शेतकरी व रिलिंग उद्योजक यांनी उत्पादित केलेल्या रेशीम कोष व रेशमी सुतास बाजारपेठ देण्यासाठी उत्तर सोलापूर तालुक्‍यातील हिरज येथे बाजारपेठ उभारण्यात येणार आहे. राष्ट्रीय कृषी विकास योजनेतून या प्रकल्पासाठी मंजूर झालेल्या सहा कोटी ९४ लाखांच्या खर्चास राज्य सरकारने प्रशासकीय मान्यता दिली आहे. त्यामुळे आता हिरजच्या खरेदी बाजारपेठेचा मार्ग मोकळा झाला आहे.

२०१८-२३ या कालावधीसाठी महाराष्ट्र सरकारने जाहीर केलेल्या वस्त्रोद्योग धोरणात अनेक उपाययोजना हाती घेण्याचे जाहीर करण्यात आले होते. त्यानुसार हिरज येथे रेशीमची बाजारपेठ निर्माण केली जाणार आहे. बाजारपेठ व प्रशासकीय खर्चासाठी सहा कोटी ५४ लाख देण्यात आले आहेत.

बाजारपेठेत विक्रीसाठी शेतकऱ्यांकडून येणारे कोष जिवंत असतात. हे कोष जिवंत ठेवण्यासाठी ड्राइंग व कोष साठवणूक करण्यासाठी सुविधा आवश्‍यक आहे. हा सुविधा निर्माण करण्यासाठी ४० लाख रुपयांच्या प्रस्तावालाही मान्यता देण्यात आली आहे. अंतर्गत रस्ते, पार्किंग, सौरऊर्जा, रेन वॉटर हार्वेस्टिंग, जागेचा विकास करणे यासह इतर आवश्‍यक बाबींसाठी हा निधी खर्च केला जाणार आहे.