बाजार समित्यांवर पणनची नजर

पुणे : राज्यातील बाजार समित्यांवरील पणन संचालनालयाचा असणारा वचक कमी झाला असून आता पणन संचालनालय बाजार समित्यांवर नजर ठेवणार आहे. बेशिस्त बाजार समित्यांना शिस्त लावण्यासाठी तालुका, जिल्हा आणि विभागीय पातळ्यांवर स्वतंत्र अधिकारी नियुक्त करण्यात येणार आहे. यासाठीचा प्रस्ताव लवकरच शासनाला पाठविण्यात येणार असल्याचे पणन संचालक डॉ. आनंद जाेददंड यांनी ‘ॲग्राेवनला‘ सांगितले.

राज्यातील ३०६ बाजार समित्यांद्वारे हाेणाऱ्या काेट्यवधी रुपयांच्या शेतमाल खरेदी विक्रीवर पणन संचालनालयाचे नियंत्रत्रण असते. मात्र पणन संचालनालयाचे गेल्या अनेक वर्षांपासून बाजार समित्यांवर नियंत्रण राहिलेले नाही. यामुळे अनेक बाजार समित्यांच्या कामकाजात अनियमितता वाढली आहे.

बाजार समित्यांवर तालुका निबंधक, जिल्हा उपनिबंधकांचे नियंत्रण असते. हि दाेन्हीही पदे सहकार विभागाकडील असून, यांच्यावर विविध सहकारी संस्थांच्या कामकाजाचे नियंत्रण असल्याने यांच्याकडून बाजार समित्या दुर्लक्षित राहत असल्याचे सध्याचे चित्र आहे. यामुळे बाजार समित्यांच्या कामकाजावरील नियंत्रण ठेवण्यासाठी पणन संचालकांना जिल्हा उपनिबंधक आणि तालुका निबंधकांवर अवलंबून रहावे लागत आहे.

मात्र आता बाजार समित्यांच्या कामकाजाला शिस्त लावण्यासाठी तालुका पातळीवर सहाय्यक संचालक पणन, जिल्हा पातळीवर उपसंचालक पणन आणि विभागीय पातळीवर सहसंचालकांची नियुक्ती केली जाणार अाहे. या नियुक्त्यांनंतर या अधिकाऱ्यांवर केवळ बाजार समित्यांच्या कामकाजावर देखरेख ठेवण्याची जबाबदारी असणार आहे.

पणन विभाग सक्षमीकरणाचाच भाग म्हणून प्रत्येक बाजार समितीवर सहकार विभागातील अधिकाऱ्यांचीदेखील सचिवपदी निवड करण्याचा शासनाच्या विचाराधिन असून, त्याची प्रक्रिया सुरु करण्यात आली आहे. यासाठी समिती स्थापन करण्यात आली असून, समितीने अहवाल शासनाला सादर केला आहे.