पणन महासंघाकडून साखर खरेदी

पुणे : बाजारात साखरेचे दर घसरल्यामुळे साखर उद्योग संकटात सापडत असल्याची भीती व्यक्त केली जात आहे. यावर राज्य सरकारने भूमिका स्पष्ट करावी, अशी मागणी कारखानदार व उद्योजकांकडून केली जात होती. सरकारनेच साखर खरेदी करावी, अशी मागणी केली जात होती. त्यावर मंत्रिमंडळापुढे प्रस्ताव ठेवून मंजुरी घेतल्यानंतर पणन महासंघाकडून साखर खरेदी करण्यात येईल, अशी माहिती सहकारमंत्री सुभाष देशमुख यांनी दिली. नवीन शासकीय विश्रामगृह येथे गुरुवारी झालेल्या बैठकीत सहकार व पणनमंत्री सुभाष देशमुख, साखर आयुक्त संभाजी कडू-पाटील यांच्यासह अन्य अधिकारी उपस्थित होते. यानंतर पत्रकारांशी बोलताना देशमुख म्हणाले, ‘‘सध्या साखरेचे दर घसरत आहेत, त्यामुळे साखर उद्योग आणि कारखानदारांमध्ये चिंतेचे वातावरण आहे. त्यामुळे राज्य सरकारने साखर खरेदी करून दिलासा द्यावा, अशी मागणी होत आहे. त्यावर गांभीर्याने चर्चा करून तूर आणि सोयाबीन खरेदीच्या धर्तीवर साखरदेखील खरेदी करण्याचे विचाराधीन आहे. ३ हजार रुपये ते ३१०० रुपये प्रतिक्विंटल खरेदी केल्यास एकूण साखर उत्पादनाच्या तुलनेत २० ते २५ टक्के साखर सरकार खरेदी करू शकते. १० ते १५ टन साखर पणन महासंघाकडून खरेदी केली जाऊ शकते.’’ पणन महासंघाद्वारे साखर खरेदी करण्याचा प्रस्ताव मंत्रिमंडळापुढे मान्यतेसाठी ठेवला जाईल. मंजुरीनंतर साखर खरेदीची प्रक्रिया सुरू केली जाईल. यामुळे साखर उद्योजक व कारखानदारांना काही प्रमाणात दिलासा मिळू शकेल. - सुभाष देशमुख, सहकार व पणनमंत्री