माथाडी कामगार संघटनांपुढे सरकार झुकले

माथाडी कामगार संघटनांपुढे सरकार झुकले
माथाडी कामगार संघटनांपुढे सरकार झुकले

बोर्डांच्या एकत्रीकरणाचा निर्णय घेतला मागे मुंबई : राज्यातल्या माथाडी कामगारांच्या संघटनांपुढे सरकार झुकले असून माथाडी बोर्डांच्या एकत्रीकरणाचा निर्णय राज्य सरकारने मागे घेतला आहे. यासंदर्भात कामगार मंत्री संभाजी पाटील यांच्या दालनात बुधवारी (ता. ३१) माथाडी कामगार नेत्यांची बैठक आयोजित करण्यात आली होती. या बैठकीत कामगार मंत्री संभाजी पाटील यांनी राज्यातील माथाडी बोर्डाच्या एकत्रीकरणाबाबत आलेली अधिसूचना मागे घेण्यात येत असल्याचे सांगितले. राज्यातल्या विविध ३६ माथाडी बोर्डाचा कारभार सुसूत्र व्हावा, यासाठी सरकारने गेल्या महिन्यात या बोर्डाच्या एकत्रीकरणाबाबत अभ्यास गट नियुक्त करत असल्याची अधिसूचना जरी करून निर्णयाच्या अंमलबजावणीला सुरवात केली होती. मात्र अनेक माथाडी बोर्डाच्या कामगार संघटनांनी सरकारच्या या भूमिकेचा विरोध केला होता. यासंदर्भात ३० जानेवारीला मुंबई कृषी उत्पन्न बाजार समितीमधील माथाडी कामगारांनी बंद ही केला होता.  माथाडी कामगारांच्या संरक्षण व कल्याणासाठी, महाराष्ट्र माथाडी, हमाल व इतर श्रमजिवी कामगार (नोकरीचे नियमन व कल्याण) अधिनियम १९६९ हा कामगार कायदा राज्यात सध्या लागू आहे. माथाडी कामगारांच्या संरक्षण व कल्याणासाठी तसेच माथाडी कायद्याची प्रभावी व परिणामकारक अंमलबजावणी करण्यासाठी राज्यात ३६ माथाडी मंडळे कार्यरत आहेत.    पण सरकारने नियुक्त अभ्यास समितीत माथाडी प्रतिनिधी घेतला नाही. या अभ्यास गटाचे अध्यक्ष कामगार आयुक्तांना देण्यात आले होते. कायद्याच्या मूळ रचनेत बदल करून कामगारांचे नुकसान करण्याच्या राज्य सरकारच्या मालकधार्जिण्या धोरणाचा माथाडी कामगार संघटनांनी विरोध केला. माथाडी मंडळात कोणताही प्रस्ताव व तक्रारी आल्यास त्यासंदर्भात मंडळाकडे लेखी निवेदने सादर करण्याची अट या अधिसूचनेत घालण्यात आली होती. हे सरकारचे मालक धार्जिणे धोरण असल्याचे आम्ही बैठकीत कामगार मंत्र्यांना सांगितले. त्यानुसार कामगार मंत्र्यांनी माथाडी संघटनांचे म्हणणे ऐकून घेऊन एकत्रीकरणाच्या संदर्भातील अधिसूचना मागे घेत असल्याचे जाहीर केल्याचे माथाडी कामगार नेते आमदार नरेंद्र पाटील यांनी सांगितले.

वरिष्ठ अधिकाऱ्यांनी कोणत्याही बाबींचा अभ्यास न करता कामगार मंत्र्यांची दिशाभूल केली असल्याचा आरोपही पाटील यांनी केला आहे. राज्याच्या ग्रामीण भागात आणि शहरी भागात माथाडी बोर्डाच्या कारभाराची पद्धत वेगळी आहे. त्यामुळे ग्रामीण आणि शहरी भागांच्या बोर्डाचे एकत्रीकरण करणेच अवघड आणि अव्यवहार्य असल्याचे पाटील यांनी सांगितले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com