‘माझी कन्या भाग्यश्री’ जाणीव जागृती रथयात्रेस प्रारंभ

सिंदखेडराजा येथे राजमाता जिजाऊ यांच्या जयंतीदिनी कार्यक्रम सिंदखेडराजा, जि. बुलडाणा : माझी कन्या भाग्यश्री योजनेच्या जाणीव जागृती रथयात्रेस शुक्रवारी (ता. १२) सिंदखेडराजा येथून ग्रामविकास, महिला व बालकल्याणमंत्री पंकजा मुंडे यांच्या हस्ते प्रारंभ झाला, तसेच या वेळी या योजनेअंतर्गत पात्र ठरलेल्या लाभार्थींना गौरविण्यात आले. या वेळी पालकमंत्री पांडुरंग फुंडकर, खासदार प्रतापराव जाधव, आमदार शशिकांत खेडेकर, जिल्हा परिषद अध्यक्ष उमाताई तायड़े, जिल्हाधिकारी डॉ. पुलकुंडवार यांची प्रमुख उपस्थिती होती. महिला व बालविकास विभागामार्फत ‘माझी कन्या भाग्यश्री’ योजनेची अंमलबजावणी करण्यात येत आहे. मुलींचा जन्मदर वाढविण्यासाठी, तसेच मुलगी माझा वारसदार ही संकल्पना समाजात रुजविण्याकरिता ही योजना सुरू करण्यात आली आहे. योजनेनुसार ७.५० लक्ष वार्षिक उत्पन्न असणाऱ्या समाजातील सर्व घटकांतील कुटुंबांमध्ये जन्माला येणाऱ्या पहिल्या दोन मुलींसाठी ही योजना लागू आहे. या योजनेचा लाभ जास्तीत जास्त कुटुंबांपर्यंत पोचविण्यासाठी महिला व बालविकास विभागामार्फत राजमाता जिजाऊ यांचा जन्म दिवस माझी कन्या भागयश्री जाणीव जागृती अभियान म्हणून साजरा करण्यात येत आहे.