कर्जवाटप न करणाऱ्या बॅंकांवर कारवाई करणार : जिल्हाधिकारी

सातारा : शेतकऱ्यांना अर्थिक अडचण भासू नये यासाठी राष्ट्रीयीकृत बॅंकांनी त्वरित पिक कर्ज वाटप करावे. ज्या बॅंका कर्ज वितरण करणार नाहीत अशा बॅंकांवर कारवाई केली जाईल असा इशारा जिल्हाधिकारी श्‍वेता सिंघल यांनी दिला.

राज्यात अनेक ठिकाणी बॅंकाकडून पीक कर्जवाटपाकडे दुर्लक्ष केले जात आहे. या पार्श्‍वभूमीवर जिल्हाधिकारी श्‍वेता सिंघल यांनी जिल्हाधिकारी कार्यालयात बॅंक प्रतिनिधींची शुक्रवारी (ता.१५) बैठक आयोजित केली होती. बैठकीस जिल्ह्यातील राष्ट्रीयीकृत बॅंकांचे प्रतिनिधी हजर होते.

जिल्ह्यात आजपर्यंत ५० टक्के पीककर्ज वितरण झाले आहे. या वितरणात २१ राष्ट्रीयीकृत बॅंकांनी उद्दीष्टाच्या तुलनेत अवघे १५ तर खासगी बॅंकांनी उद्दीष्टाच्या तुलनेत आठ टक्के कर्ज वितरण केले असल्याचे दिसून आले आहे. यामुळे राष्ट्रीयीकृत व खासगी बॅंकांच्या प्रतिनिधींची बैठक घेण्यात आली.

बैठकीत जिल्हाधिकारी सिंघल यांनी खरीप पिक कर्ज उद्दिष्ट असलेल्या बॅंकांना पुढील दहा दिवसांत शाखानिहाय मेळावे आयोजित करा. या मेळाव्याच्या ठिकाणाची माहिती द्या, मेळाव्याच्या ठिकाणी शेतकऱ्यांना सातबारा उतारा उपलब्ध व्हावा यासाठी तलाठी उपस्थित राहण्याचे आदेश दिले आहेत. या दहा दिवसांत कोणत्या बॅंकांनी किती कर्ज वाटप केले यांची आकडेवारी पुढील बैठकीत तपासली जाणार आहे. यामध्ये ज्या बॅंकांच्या कर्जवाटपात सुधारणा दिसून येणार नाही अशा बॅंकांवर कडक कारवाई केली जाणार आहे. तसेच बैठकीस ज्या बॅंकांचे प्रतिनिधी अनुपस्थित आहेत अशा बॅंकांना खुलासा मागविण्यात येणार असल्याचे त्यांनी सांगितले.

सातारा जिल्हा मध्यवर्ती बॅंकेने ७२४ कोटी २४ लाख म्हणजेच उद्दिष्टाच्या ८९ टक्के पीककर्ज वितरण केले आहे. यामुळे या बॅंकेचे जिल्हाधिकारी श्‍वेता सिंघल यांनी अभिनंदन केले. तसेच इतर बॅंकांनी जिल्हा मध्यवर्ती बॅंकेप्रमाणे कर्जवाटप करावे असे आदेश त्यांनी दिले.