नाशवंत भाजीपाला, फळे उपाययोजना समितीची उद्या बैठक

सोलापूर : राज्य शासनाने स्थापन केलेल्या नाशवंत भाजीपाला व फळे उपाययोजना समितीची रविवारी (ता.19) सोलापुरात सहकार व पणनमंत्री सुभाष देशमुख यांच्या उपस्थितीत बैठक होणार आहे. या समितीच्या आतापर्यंतच्या कामकाजाचा आढावा मंत्री देशमुख या वेळी घेतील. तसेच समितीसमोर उपस्थित झालेल्या शेतकऱ्यांच्या प्रश्‍नासंदर्भातही या वेळी चर्चा होणार आहे, अशी माहिती समितीचे सदस्य अंकुश पडवळे यांनी बुधवारी (ता.15) येथे पत्रकार परिषदेत दिली.

सोलापुरातील राष्ट्रीय डाळिंब संशोधन केंद्रामध्ये रविवारी सकाळी दहा वाजता ही बैठक होईल. पणनमंत्री देशमुख यांनी नाशवंत फळे व भाजीपाला यांचे नुकसान टाळण्यासाठी शासनाला योग्य त्या शिफारशी व्हाव्यात, यासाठी ही समिती स्थापली आहे. राज्य कृषी पणन मंडळाचे कार्यकारी संचालक सुनील पवार यांच्या अध्यक्षतेखालील या समितीत कृषी मूल्य आयोगाचे अध्यक्ष पाशा पटेल, शेतकरी प्रतिनिधी विलास शिंदे (नाशिक), प्रभाकर चांदणे, अंकुश पडवळे (सोलापूर), श्रीराम गाढवे, सोपान कांचन (पुणे) श्रीधर ठाकरे (नागपूर) यांचा समावेश केला आहे.

गेल्या काही महिन्यांत समितीच्या चार बैठका झाल्या आहेत. राज्यातील विविध भागांत जाऊन थेट शेतकऱ्यांशी चर्चा करून ही समिती आपली निरीक्षणे नोंदवत आहे, शेतकऱ्यांच्या सूचना ऐकत आहे. आता सोलापुरातील ही शेवटची बैठक असणार आहे. या बैठकीत स्वतः मंत्री देशमुख सहभागी होत आहेत. त्यांच्या सूचना, शेतकऱ्यांच्या सूचना या सगळ्यांबाबत यामध्ये सविस्तर चर्चा होईल. त्याशिवाय आतापर्यंतच्या कामकाजाचाही ते आढावा घेतील, असेही पडवळे यांनी सांगितले. या बैठकीला निमंत्रित शंभर शेतकऱ्यांनाही बोलावण्यात आले आहे, असेही ते म्हणाले. या वेळी तुकाराम मेटकरी, जयराम आलदर, नंदकुमार वरे आदी उपस्थित होते.

२५ ते ३० टक्के शेतमालाची नासाडी राज्यात सात लाख ४२ हजार हेक्‍टरवर फळे व ६ लाख ९२ हजार हेक्‍टरवर भाजीपाल्याचे उत्पादन घेतले जाते. राज्यात फळाचे उत्पादन १०८ मेट्रिक टन तर भाजीपाल्याचे उत्पादन १०५ लाख मेट्रिक टनापर्यंत इतके आहे. मात्र नाशवंत शेतमालाची शास्त्रोक्त काढणी, काढणी पश्‍चात हाताळणी, विक्री व्यवस्थेचा अभाव, मध्यस्थांची मोठी साखळी, यासारख्या अडचणीमुळे २५ ते ३० टक्के मालाची नासाडी होते, असे अभ्यासाअंती स्पष्ट झाले आहे. या मुद्यांवर ही समिती काम करत आहे, असेही पडवळे म्हणाले.