लातूर :थकित पैशांसाठी अडत्यांचे उपोषण

लातूर : लातूर उच्चत्तम कृषी उत्पन्न बाजर समितीच्या अडत बाजारातील व्यापारी व अडत्यांतील संघर्ष मिटण्याची स्थिती नाही. वारंवार आंदोलन केले जात आहेत. अडत्यांना एका व्यापाऱ्यांकडून पेमेंट मिळत नसल्याने २६ अडत्यांनी बाजारा समितीच्या आवारात उपोषण सुरू केले आहे.

ईनाममधील व्यवहारातून झालेले हे एक कोटीवरचे पेमेंट थकले आहे. गेल्या वर्षीच्या अखेरीस या अडत बाजारातील तीन व्यापाऱ्यांनी अडत्यांकडून मोठ्या प्रमाणात सोयाबीन व हरभऱ्याची खरेदी केली होती. हे सर्व व्यवहार ईनाममधून करण्यात आले होते. पण तीन मोठ्या व्यापाऱ्यांनी अडत्यांना पेमेंटच केले नव्हते. त्यामुळे अडत्यांनी आंदोलन सुरू केले. 

अडत बाजार बंद पाडला होता. यात बाजार समितीने याची दखल घेत आतापर्यंत दोन व्यापाऱ्यांचे पेमेंट कसे तरी करून घेतले. काहींना याचे धनादेशही देण्यात आले. पण गोवर्धन पल्लोड या व्यापाऱ्याकडे मात्र २६ अडत्यांचे कोटीवर पेमेंट राहिले आहे. त्यामुळे अडते आर्थिक अडचणीत सापडले आहेत. हा व्यापारी शहर सोडून गेला. त्यामुळे अडत व्यापारी असोसिएशनच्या माध्यमातून वारंवार मागणी करून बाजार समिती याकडे लक्ष देत नाही. म्हणून हे उपोषण सुरू केले आहे. त्यामुळे बाजारात शुकशुकाटच राहिला.

सोमवारी (ता.२०) सकाळी अडत बाजारात हालकी वाजवून फेरी काढण्यात आली. त्यानंतर हे उपोषण सुरू करण्यात आले. बाजार समितीने या व्यापाऱ्यावर, त्याच्या जामिनदारावर कारवाई करावी, अशी मागणी या अडत्यांची आहे.

या व्यवहारात गजानन काळे, मदनलाल बंग, विठ्ठलराव वीर, गणपतराव जाधव, पांडूरंग बेडदे, ऋषिकेश चव्हाण, श्रीकिशन चव्हाण, यशवंत बडे, श्रीनिवास तापडे, प्रेमचंद काबरा, नामदेव शिवणे, रामगोपाल बजाज, शेषेराव रुकमे, सुनील जगताप, शांतेश्वर मुक्ता, नरसिंग शिंदे, शरद शिंदे, राजेंद्र आलमले, उद्धव ओनामे, विजय गुणाले या अडत्यांचे पेमेंट थकले आहे.