सांगलीतील दुष्काळी भागात दूध संकलन घटले

सांगली : जिल्ह्यातील दुष्काळी भागात शेतीबरोबर प्रामुख्याने दुग्ध व्यवसाय केला जातो. गेल्या तीन महिन्यांपासून दुष्काळी पट्ट्यात भेडसावत असलेल्या चाराटंचाईचा परिणाम दूध उत्पादनावर झाला आहे.

जिल्ह्याचे सरासरी दूध उत्पादन दररोज १४ लाख २० हजार लिटर इतके आहे. जिल्ह्यात प्रतिदिनी सुमारे १६ हजार ७९९ लिटरने दूध संकलनात घट झाली आहे. सध्या १३ लाख ९५ हजार २५६ लिटर दूध संकलन होत आहे.

सांगली जिल्ह्यात सहकारी १७, तर खासगी ७ दूध संघ आहेत. मार्च महिन्यात जिल्ह्यातील सहकारी आणि खासगी दूध संघांत प्रतिदिन १४ लाख ०४ हजार २१६ लिटर दूध संकलन होते. मार्च महिन्याच्या तुलनेत एप्रिल महिन्यात प्रति दिन दूध संकलनात ७ हजार ७३९ लिटरने वाढ झाली.

जिल्ह्यातील दुष्काळी पट्ट्यातील आटपाडी, जत, कवठेमहांकाळ, खानापूर, तासगाव या तालुक्‍यांत दुधाचे सर्वाधिक उत्पादन होते. मात्र या भागात चारा आणि पाणी पुरेसे मिळत नाही. त्यामुळे या पट्ट्यातील दूध उत्पादनात घट झाली आहे. पलूस, वाळवा, मिरज तालुक्‍यात दूध उत्पादनात घट झाली नसल्याचे शासकीय दूध संघाच्या सूत्रांनी सांगितले.