गायी-म्हशींसह उद्या मंत्रालयावर मोर्चा

मुंबई : दुधाला दर मिळावा यासाठी सुरू असलेल्या आंदोलनाला अधिक धार येण्याची शक्यता निर्माण झाली आहे. आमदार बच्चू कडू यांच्या प्रहार संघटनेच्यावतीने ९ मे रोजी मंत्रालयावर मोर्चा काढण्यात येणार असल्याची माहिती आमदार बच्चू कडू यांनी दिली आहे. राज्य सरकारने गायीच्या दुधाला २७ रुपये आणि म्हैशीच्या दुधाला ३६ रुपये दर जाहीर केला असला, तरी हे दर देण्यात सहकारी तसेच खासगी दूध संस्थांनी असमर्थता दर्शवल्याने गेल्या काही दिवसांपासून राज्यात दूध दराचे आंदोलन पेटले आहे. पश्चिम महाराष्ट्र आणि मराठवाड्यात अनेक आंदोलकांनी मोफत दूध वाटपाचे कार्यक्रमही घेतले आहेत. मात्र, तरीही सरकारकडून दखल घेतली जात नसल्याचा आरोप करीत अमरावतीचे आमदार बच्चू कडू यांच्या प्रहार संघटनेने ९ मे रोजी मंत्रालयावर मोर्चा काढणार असल्याचे जाहीर केले आहे.  दुधाला दर मिळावा, सहकारी दूध संस्थांवर कारवाई करावी, तसेच शेतकऱ्यांची मोठ्या प्रमाणावर लूट करणाऱ्या खासगी दूध संघांवर नियंत्रण आणावे. सध्या कोणतेच नियंत्रण नसल्याने अथवा सरकारला कारवाई करण्याचे कोणतेच अधिकार नसल्याने खासगी दूध संस्थांनी शेतकऱ्यांना लुबाडण्याचे काम चालवले असल्याचे कडू यांनी सांगितले. या मागण्यांसाठी मंत्रालयावर गायी म्हैशीसह मोर्चा काढण्यात येणार आहे. प्रसंगी मंत्र्यांच्या दालनात घुसून आपल्या मागण्या मांडणार असल्याचे त्यांनी सांगितले. आमदार कडू यांच्या आंदोलनाची स्टाईल आणि पद्धत पाहता ते मंत्रालयात गायी म्हैशींसह घुसल्यास आश्चर्य वाटणार नाही, त्यामुळे सुरक्षा यंत्रणा आतापासूनच सतर्क राहिल्या आहेत.