पाण्यासाठी दुष्काळी भागातील आमदारांना एकत्र करणार ः आमदार देशमुख

मंगळवेढा, जि. सोलापूर : सोलापूर, सांगली आणि सातारा या तीन जिल्ह्यांतील दुष्काळी म्हणून ओळखल्या जाणाऱ्या १३ तालुक्‍यांना पाणी मिळावे, यासाठी नागनाथअण्णा नाईकवाडी यांनी सुरू केलेली पाणी चळवळ आता तरुणांनीच हाती घ्यावी; पण आपण स्वतः दुष्काळी भागातील सर्व आमदारांना एकत्र आणून म्हैसाळ, टेंभूचा पाणीप्रश्‍न विधिमंडळात मांडू, असे आमदार गणपतराव देशमुख यांनी मंगळवारी (ता.२६) सांगितले.

मंगळवेढा येथील यशवंत मैदानावर रौप्यमहोत्सवी पाणी परिषदेचे आयोजन करण्यात आले होते. त्या वेळी आमदार देशमुख बोलत होते. माजी केंद्रीय मंत्री सुशीलकुमार शिंदे, पाणी परिषदेचे निमंत्रक वैभव नाईकवाडी, आमदार भारत भालके, नगराध्यक्षा अरुणा माळी, माजी मंत्री लक्ष्मण ढोबळे, शरद पाटील, सांगोला पंचायत समितीच्या सभापती मायाक्का यमगर, बाबूराव गुरव, माजी आमदार विश्‍वनाथ चाकोते, नगरसेवक चेतन नरोटे, पाणी  संघर्ष समितीचे अध्यक्ष शिवाजीराव काळुंगे, राष्ट्रवादीचे नेते राहुल शहा, जिल्हा परिषद सदस्या शैला गोडसे, शेकापचे नेते चंद्रकांत देशमुख आदी उपस्थित होते.

 देशमुख म्हणाले, की सध्या सरकारने ‘एआयबीपी'' योजना बंद केली आहे. नव्याने सुरू केलेल्या पंतप्रधान सिंचन योजनेमधून सहा टक्के दराने कर्जरूपाने निधी उपलब्ध करून दिला आहे. राज्य सरकारने सुधारित खर्चाला मंजुरी दिल्याने सांगोला तालुक्‍यातील चार व मंगळवेढा तालुक्‍यातील पाच हजार क्षेत्राला पाणी मिळणार आहे. शिंदे म्हणाले, "आजही देशातील ६० कोटी लोकांना पुरेसे पाणी मिळत नसल्याचा नीती आयोगाचा अहवाल आहे. देशात पाणी उपलब्ध आहे. मात्र, त्याचे योग्य नियोजन होत नाही. दुष्काळी भागातील पाण्यासाठी चळवळ उभा करण्याचे काम नागनाथअण्णांनी केले. मी आज सत्तेत नाही; मात्र भविष्यात संधी मिळाल्यास पाणी चळवळीच्या सोबत आहे. दरम्यान, आमदार भालके, माजी मंत्री ढोबळे आदींची भाषणे झाली. ॲड. भारत पवार यांनी प्रास्ताविक केले. इंद्रजित घुले यांनी सूत्रसंचालन केले.

पाणी परिषदेमध्ये झालेले ठराव