मॉन्सून एक्सप्रेस कोकणात दाखल; कोल्हापूरपर्यंत मजल

पुणे : अरबी समुद्रात आलेल्या वायू चक्रीवादळामुळे आगमन लांबलेल्या मॉन्सूनची प्रतिक्षा अखेर संपली आहे. मॉन्सूनने गुरूवारी (ता.२०) कोकणात दमदार हजेरी लावत रत्नागिरी, कोल्हापूरपर्यंत मजल मारली आहे. मॉन्सून दाखल झाल्यानंतर उद्यापासून (ता. २२) सुर्याचा आर्दा नक्षत्रात प्रवेश होत असून, वाहन हत्ती असल्याने जाेरदार पावसाचा अंदाज असून, दुष्काळाने होरपळणाऱ्या महाराष्ट्राला दिलासा मिळणार आहे.

अरबी समुद्रात गुजरातच्या किनाऱ्यावर असलेल्या ‘वायू’ चक्रीवादळामुळे मॉन्सूनच्या वाटचालीवर परिणाम झाला. वादळ निवळल्यानंतरही अरबी समुद्रावरील शाखेचे प्रवाह मंदच असल्याचे दिसून आले आहे. मॉन्सूनने अपेक्षित चाल केली नसून, महाराष्ट्रातील आगमन शुक्रवारपर्यंत (ता.२१) लांबण्याची यापुर्वीच वर्तविली होती. मॉन्सूनने १४ जून रोजी दक्षिण कर्नाटकपर्यंतची वाटचाल पुर्ण केली असून, बुधवारीदेखील(ता.१९) प्रगतीची सीमा कायम होती. रविवारी (ता. १६) पुर्व भारतात पोचलेल्या मॉन्सूनने प्रगती केलेली नाही. शुक्रवारी मॉन्सूनची आगमनाची वर्दी मिळाली आहे.

शनिवारपर्यंत (ता. २२) बंगालच्या उपसागराच्या उत्तर भागात कमी दाबाचे क्षेत्र तयार होण्याचे संकेत आहेत. वाढलेले वाऱ्याचे प्रवाह, समुद्राला उधाण येऊ लागले आहे. यातच किनारपट्टीय भागात ढगांची दाटी झाली असून, कोकणात पावसाला सुरवात झाली आहे. कोकणात पावसाने जोर धरला आहे. तर रविवारपासून (ता. २३) मध्य महाराष्ट्रात पावसाचे प्रमाण वाढणार आहे.