बुधवारपासून कोकण, मध्य महाराष्ट्रात पावसाची शक्यता

पुणे : राज्यात बहुतांशी ठिकाणी पावसाने उघडीप दिली आहे. रविवारी (ता. १) दुपारनंतर विदर्भ वगळता राज्यात सर्वदूर मुख्यत: निरभ्र आकाश होते. बुधवारपर्यंत (ता. ४) राज्यात पावसाची उघडीप कायम राहणार असून, तुरळक ठिकाणी पावसाची शक्यता आहे. तर बुधवारपासून कोकण, मध्य महाराष्ट्रात पाऊस पडण्याचा अंदाज वर्तविण्यात आला आहे.      दरम्यान, रविवारी (ता.१) गडचिरोली, यवतमाळ जिल्ह्यात काही भागात मुसळधार पावसाने हजेरी लावली. रविवारी सकाळपर्यंतच्या २४ तासांमध्ये रत्नागिरी जिल्ह्यात अनेक ठिकाणी मुसळधार पाऊस पडला. सावर्डे येथे १७७ मिलिमीटर पावसाची नोंद झाली. तर असुर्डे, शिरगाव, राजापूर येथे १०० मिलिमीटरपेक्षा अधिक पाऊस झाला. मध्य महाराष्ट्र, विदर्भात तुरळक ठिकाणी पावसाने हजेरी लावली. तर मराठवाड्यात मुख्यत: कोरडे हवामान होते. मॉन्सूनचा आस असलेला कमी दाबाचा पट्टा (मॉन्सून ट्रफ) हिमालय पर्वताच्या पायथ्याकडे सरकला आहे. तर महाराष्ट्राच्या दक्षिण किनाऱ्यालगत समुद्र सपाटीपासून ७.६ किलोमीटर उंचीवर चक्राकार वारे वाहत असून, या भागापासून लक्षद्वीप बेटांपर्यंत हवेचा कमी दाबाचा पट्टा सक्रिय आहे. गोवा, कर्नाटक, केरळच्या किनाऱ्यालगत दाट ढग आहेत. तर अांध्र प्रदेशाच्या उत्तर भागात समुद्र सपाटीपासून ४.५ ते ५.८ किलोमीटर उंचीवर चक्राकार वाऱ्यांची स्थिती असल्याने विदर्भात ढग जमा झाले होते. रविवारी (ता.१) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस (मिलिमीटरमध्ये - स्रोत कृषी विभाग) : कोकण : चिपळूण ६५, खेरडी ६२, वाहल ५६, सावर्डे १७७, असुर्डे ११८, कळकवणे ४७, शिरगाव १०५, दापोली ५०, बुरवंडी ३०, दाभोल ५६, माखजन ३२, राजापूर १४०, सवंडल ५४, जैतापूर ३२, मोखडा ४८, खोडला ६५ मध्य महाराष्ट्र : इगतपुरी ५२, धारगाव ३६, मंगळवेढा ३२, देशिंग २०, आंबा ३९.  विदर्भ : मोताळा २७, शेंदूर्जन ३०, पेंढरी २२.