यंदा सरासरीपेक्षा कमी ‘मॉन्सून’? अमेरिकन हवामान तज्ज्ञांचा अंदाज

पुणे : प्रशांत महासागरात जून महिन्यानंतर एल निनो स्थिती तयार होण्याची शक्यता आहे. भारतातील माॅन्सूनच्या पावसावर त्याचा परिणाम होऊन सरासरीपेक्षा कमी पाऊस पडण्याचा अंदाज अमेरिकेतील हवामान तज्ज्ञांनी वर्तविला आहे. आॅस्ट्रेलियाच्या पूर्व भागातील धान्य उत्पादक प्रदेशातही पावसावर परिणाम होणार असल्याचे तज्ज्ञांनी स्पष्ट केले.

प्रशांत महासागरात असलेली ला निना स्थिती निवळत असून, हवामान सर्वसाधारण होत आहे. त्यामुळे वर्षाच्या दुसऱ्या टप्प्यात एल निनो स्थिती तयार होण्याची शक्यता असल्याचे अमेरिकेतील वरिष्ठ कृषी हवामान शास्त्रज्ञ कायल टॅप्ली यांनी नमुद केले आहे. एल निनो स्थितीमुळे जून महिन्यानंतर अशिया खंडाच्या काही भागांत हवामान कोरडे राहणार आहे. तर दक्षिण अमेरिकेत सरासरीपेक्षा अधिक पाऊस पडण्याचा अंदाज आहे. इतरही हवामान तज्ज्ञांनी वर्षाच्या अखेरच्या टप्प्यात एल निनो तयार होण्यास दुजोरा दिला आहे.

देशातील माॅन्सून हंगामाचा विचार करता गतवर्षी सरासरीपेक्षा कमी पाऊस पडला होता. मध्य आणि उत्तरेकडील राज्यांमध्ये पिकांसाठी आवश्‍यकतेपेक्षा कमी पाऊस पडला होता. भारतीय हवामान विभागाने ९८ टक्के पावसाचा अंदाज वर्तविला होताा. मात्र जून ते सप्टेंबर या मॉन्सूनच्या कालावधीत ९५ टक्के पाऊस पडला होता. यंदाही सरासरीपेक्षा कमी पाऊस पडण्याची शक्यता असल्याने भारतातील सोयाबीन, भुईमूग, कापूस या पिकांवर परिणाम होणार आहे. २०१७ मधील उष्ण आणि कोरड्या हवामानामुळे आॅस्ट्रेलियातील गहू उत्पादनात गेल्या दहा वर्षांत प्रथमच जवळपास ३० टक्क्यांची घट झाली असल्याचे टपली यांनी नमूद केले आहे.