नागज परिसरात सहा हजार बेदाणा शेड

नागज परिसरात सहा हजार बेदाणा शेड
नागज परिसरात सहा हजार बेदाणा शेड

सांगली : सांगली जिल्ह्यातील नागज (ता. कवठे महंकाळ) येथे साधारणपणे जानेवारी ते एप्रिल या चार महिन्यांत चालणाऱ्या व कोट्यावधी रुपयांची उलाढाल असणाऱ्या बेदाणा हंगामास सुरवात झाली आहे. कवठेमहांकाळ तालुक्‍यातील आगळगाव, शेळकेवाडी, केरेवाडी, घोरपडी, चोरोची आदी गावांतील बेदाणाशेडमध्ये रोजगारी मंडळींची वर्दळ वाढू लागली आहे. या परिसरात सुमारे ६ हजार बेदाणा शेड आहेत. यापैकी या हंगामात ७० ते ८० टक्के बेदाण्याचे शेडमध्ये बेदाणानिर्मिती होण्याची शक्‍यता आहे. जिल्ह्यात अवकाळी पाऊस झाल्याने द्राक्षाचे मोठ्या प्रमाणात नुकसान झाले आहे. त्यामुळे बेदाणा उत्पादनावर परिणाम होण्याची शक्‍यता आहे. सध्या द्राक्षाला सरासरी १५० ते २२५ रुपये प्रति चार किलो असे दर आहेत. त्यामुळे बहुतांश द्राक्ष उत्पादक शेतकरी द्राक्ष विक्रीसाठी पुढे आले आहेत.  या भागातील कोरडे हवामान, स्वच्छ सूर्यप्रकाश, मनुष्यबळ, वाहतूक व्यवस्था, कच्च्या मालाची उपलब्धता आणि जवळपासची बाजारपेठ या सर्व सुविधा उपलब्ध असल्याने कवठेमहांकाळ तालुक्‍यात सर्वाधिक बेदाणा उत्पादन होते. तालुक्‍यात बेदाण्याचे सुमारे ६ हजार शेड आहेत. हंगाम सुरू होण्याअगोदर त्याची स्वच्छता केली जाते. सहा हजार शेडपैकी अंदाजे ७० ते ८० टक्के शेडमध्ये बेदाणानिर्मिती केली जाते. या भागात सांगली, मिरज, कवठेमहांकाळ, वाळवा, पलूस, तासगाव या तालुक्‍यांतील द्राक्ष उत्पादक शेतकरी बेदाणा तयार करण्यासाठी नागज येथे येतात. चार महिन्यांत चालणाऱ्या या बेदाणा हंगामामध्ये केवळ कवठेमहांकाळच नव्हे तर नजीकच्या जत, तासगाव, आटपाडी, सांगोला या तालुक्‍यांतील तसेच परजिल्हा व परप्रांतीय मजूर महिला-पुरुषांना मोठ्या प्रमाणात रोजगार उपलब्ध होतो. कवठेमहांकाळ व लगतच्या सांगोला तालुक्‍यातील हवामान बेदाणा उद्योगास पोषक आहे. त्यामुळे या तालुक्‍यातील कृषी उत्पन्न तुलनेत कमी असले तरी बेदाणा हंगामातील उलाढाल मात्र सधन भागातील उत्पन्नापेक्षा अधिक असते. द्राक्षापासून बेदाणा निर्माण करण्यासाठी कवठेमहांकाळ तालुक्‍यातील हवामान अतिशय योग्य आहे. इथल्या कोरड्या व भरपूर सूर्यप्रकाश असलेल्या वातावरणात चार किलो द्राक्षापासून सुमारे एक ते दीड किलो बेदाणा तयार होतो. त्यामुळे मोठ्या प्रमाणावर बेदाणानिर्मिती व्यवसाय येथे चालतो. खरे तर हंगामी का असेना या परिसरातील नागरिकांना मोठ्या प्रमाणात रोजगार उपलब्ध करून देणाऱ्या बेदाणा व्यवसायाला उद्योगाचा दर्जा मिळण्याची गरज आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com