सोलापुरात मोसंबी, डाळिंबाचे दर टिकून

सोलापूर ः सोलापूर कृषी उत्पन्न बाजार समितीच्या आवारात गतसप्ताहात डाळिंब, मोसंबीला चांगलाच उठाव मिळाला. मागणी चांगली असल्याने त्यांचे दरही टिकून राहिल्याचे बाजार समितीच्या सूत्रांकडून सांगण्यात आले. डाळिंबाला सर्वाधिक ७० रुपये प्रतिकिलो आणि मोसंबीला ३० रुपयांपर्यंत दर मिळाला. बाजार समितीच्या आवारात गतसप्ताहात मोसंबीची आवक रोज ९०० ते एक हजार क्विंटलपर्यंत राहिली. डाळिंबाची आवक एक ते दीड टनापर्यंत राहिली. आठवडाभरात त्यात किरकोळ चढ-उतार राहिला; पण मागणी चांगली असल्याने गेल्या काही दिवसांच्या तुलनेत विचार करता, दरामध्ये थोडीशी सुधारणा झाली. विशेषतः डाळिंबामध्ये चांगली सुधारणा होत आहे. मोसंबीची आवक उस्मानाबाद, लातूर भागातून झाली, तर डाळिंबाची आवक जिल्ह्यातूनच सर्वाधिक झाली. मोसंबीला प्रतिकिलोसाठी २० ते ३० व सरासरी १५ रुपयांचा दर मिळाला. डाळिंबाला २० ते ७० व सरासरी ३५ रुपये रुपयांपर्यंतचा दर मिळाला. त्याशिवाय लिंबू, पपईलाही मागणी कायम होती; पण त्यांचे दरही काहीसे कमीच राहिले; पण टिकून राहिले. लिंबूची आवक रोज ४० ते ५० क्विंटल आणि पपईची आवक ५ ते १० क्विंटलपर्यंत राहिली. लिंबूला प्रतिदहा किलोसाठी ६० ते १०० रुपये आणि पपईला ७० ते ८० रुपये असा दर मिळाला. त्याशिवाय फळभाज्यामध्ये ढोबळी मिरची, हिरवी मिरची आणि गवारची आवक कमीच राहिली. प्रत्येकी २० ते ५० क्विंटलपर्यंत दिवसाची उलाढाल होती; पण दर बऱ्यापैकी राहिले. ढोबळी मिरचीला प्रतिदहा किलोसाठी १०० ते २२० रुपये, हिरव्या मिरचीला १०० ते १५० रुपये आणि गवारला २५० ते ४०० इतका दर मिळाला. कांद्याचे दरही पुन्हा जैसे थे या सप्ताहात कांद्याची आवकही पुन्हा काहीशी वाढली. कांद्याची आवक रोज १५० ते २०० गाड्यांपर्यंत राहिली. कांद्याला मोठी मागणी आहे. त्यामुळे अजूनही कांद्याचे दर टिकून आहेत. कांद्याला प्रतिक्विंटल २०० ते २८०० व सरासरी २००० रुपये इतका दर मिळाल्याचे सांगण्यात आले.