कापूस क्षेत्रात गुंतवणूकवाढीच्या मदतीकरिता सामंजस्य करार

मुंबई ः कापूस उद्योगाला भेडसावणाऱ्या पतपुरवठा समस्येच्या पार्श्वभूमीवर बॉम्बे स्टॉक एक्सचेंज (बीएसई) आणि कॉटन असोसिएशन ऑफ इंडिया (सीएआय) यांच्यात एक महत्त्वपूर्ण सामंजस्य करार (एमओयू) बुधवारी (ता. ५) येथील बीएसईच्या मुख्य कार्यालयात करण्यात आला. राज्याच्या कृषी मूल्य आयोगाचे अध्यक्ष पाशा पटेल यांच्या पुढाकाराने या कराराला मूर्त स्वरूप आले आहे. यामुळे कापूस क्षेत्रात गुंतवणूकवाढीला मदत होईल, असा आशावाद व्यक्त होत आहे.

या वेळी ‘बीएसई’चे सीईओ आशिषकुमार चौहान, ‘सीएआय’चे अध्यक्ष अतुल गणात्रा, राज्य कृषी मूल्य आयोगाचे अध्यक्ष पाशा पटेल, आमदार तानाजी मुटकुळे, ‘बीएसई’चे समीर पाटील, नीरज कुलश्रेष्ठ आदी उपस्थित होते.

पाशा पटेल यांच्या पुढाकाराने काही दिवसांपूर्वी विदर्भात कापूस उद्योगाशी संबंधित घटकांची, व्यापाऱ्यांची व्यापक बैठक बोलावण्यात आली होती. या बैठकीसाठी देशभरातील कापूस प्रक्रिया उद्योजकही मोठ्या संख्येने उपस्थित होते. बैठकीत विशेषतः कापूस उद्योजकांना भेडसावणाऱ्या पत पुरवठ्याच्या समस्येकडे लक्ष वेधण्यात आले होते. डिसेंबर-जानेवारीनंतर पैशाअभावी कापूस व्यापारी बाजारात चांगला कापूस असूनही खरेदी करू शकत नाहीत. त्यामुळे शेतकऱ्यांच्या चांगल्या कापसालाही योग्य दर मिळत नाही. त्या पार्श्वभूमीवर बीएसई आणि कॉटन असोसिएशन ऑफ इंडिया यांच्यातील या सामंजस्य करारामुळे कापूस उद्योगात पत पुरवठ्याचा ओघ वाढेल. त्यामुळे व्यापाऱ्यांची क्रयशक्ती वाढून शेतकऱ्यांना योग्य मोबदला मिळण्यास मदत होईल, असा दावा करण्यात आला आहे.

या कराराच्या अनुषंगाने सीएआय आणि राज्य कृषी मूल्य आयोगाकडून व्यापाऱ्यांसाठी एक कार्यपद्धती तयार करून दिली जाणार आहे. याअंतर्गत व्यापार कसा असेल, याची निश्चिती यात करून दिली जाणार आहे. तसेच येत्या महिन्याभरात सीएआय आणि राज्य कृषी मूल्य आयोग राज्यातील मोठ्या कापूस उत्पादकांसोबत, व्यापारी, खरेदीदार आणि गुंतवणूकदार यांची एक व्यापक कार्यशाळा आयोजित करणार आहे. या कार्यशाळेसाठी सुमारे पाचशे जण उपस्थित राहतील, असे नियोजन केले जाणार आहे. कापूस उत्पादक ते उद्योजक अशी मध्यस्थमुक्त साखळी करण्यावर यात विशेष भर दिला जाणार असल्याचे सांगण्यात आले.