राज्यस्तरीय आविष्कार-२०१७ स्पर्धा १५ ते १७ जानेवारी दरम्यान

राहुरी, जि. नगर : राहुरीच्या महात्मा फुले कृषी विद्यापीठात राज्यस्तरीय संशोधन स्पर्धा आविष्कार-२०१७ चे आयोजन १५ ते १७  जानेवारी या कालावधीत करण्यात आले आहे. या कार्यक्रमाचे उदघाटन बिहार येथील नालंदा विद्यापीठाचे कुलपती डॉ. विजय भाटकर यांच्या हस्ते होणार आहे. कुलगुरू डॉ. के. पी. विश्वनाथा अध्यक्षस्थानी आहेत.  अाविष्कार संशोधन स्पर्धेमध्ये राज्यातील कृषी व अकृषी असे एकूण २० विद्यापीठांचे ९६० विद्यार्थी विविध संशोधन प्रकल्प सादर करणार आहेत. विद्यार्थ्यांबरोबर ४० संघनायक सहभागी होणार आहेत. स्पर्धेतील संशोधन प्रकल्पांचे मूल्यमापन करण्यासाठी परराज्यांतून ३६ तज्ज्ञ परीवेक्षक बोलविण्यात आलेले आहेत. या संशोधन स्पर्धेमध्ये विविध विभागांत विद्यार्थी त्यांचे संधोधन प्रकल्प सादर करणार आहेत. यामध्ये पहिला विभाग मानवता, भाषा आणि कला, दुसरा विभाग वाणिज्य, व्यवस्थापन आणि विधी, तिसरा विभाग विज्ञान, चौथा विभाग कृषी व पशुसंवर्धन, पाचवा विभाग अभियांत्रिकी आणि तंत्रज्ञान, सहावा विभाग औषधे आणि फार्मसी या सहा विभागांतून पदवी, पदवीव्युत्तर, पीएचडी आणि शिक्षक आपले संशोधन प्रकल्प सादर करणार आहेत.  या तीन दिवस चालणाऱ्या आविष्कार स्पर्धेचा समारोप १७ जानेवारीस होणार आहे. या प्रसंगी नवी दिल्ली येथील भारतीय कृषी अनुसंधान परिषदेचे उपमहासंचालक (उद्यानविद्या आणि पीकशास्त्र) डॉ. ए.के. सिंग प्रमुख पाहुणे म्हणून उपस्थित असणार आहे. कुलगुरू डॉ. के.पी. विश्वनाथ अध्यक्षस्थानी आहेत. या वेळी विद्यापीठाचे संचालक विस्तार शिक्षण डॉ. किरण कोकाटे, अधिष्ठाता डॉ. अशोक फरांदे, संचालक संशोधन डॉ. शरद गडाख आणि मान्यवर उपस्थित असणार आहेत.