उडीद खरेदीत घोळप्रकरणी तिघांविरुद्ध गुन्हा

बुलडाणा : नाफेडच्या खरेदी केंद्रावर उडीद खरेदीत घोळ समोर येऊ लागला असून शासनाची फसवणूक केल्या प्रकरणी बुलडाणा शहर पोलिस ठाण्यात तिघांविरुद्ध गुन्हा दाखल झाला अाहे. पणन अधिकाऱ्याच्या तक्रारीविरुद्ध हा गुन्हा दाखल करण्यात आला. नाफेडने सुरू केलेल्या खरेदी केंद्रावर चिखली तसेच बुलडाणा येथे उडीद खरेदीमध्ये मोठा घोळ समोर येण्याची चिन्हे अाहेत.  उडीद खरेदीत गोंधळ झाल्याची तक्रार स्वाभीमानी शेतकरी संघटनेने जिल्हा उपनिबंधकांकडे केली होती. त्यासाठी उपनिबंधकांनी चौकशी समितीचे गठण करून चौकशी सुरू केली आहे. बुलडाणा येथील खरेदी केंद्रावर तिघांनी २९ डिसेंबर २०१७ पूर्वी शासकीय उडीद खरेदीत गैरप्रकार करून शासनाची तीन लाख ३४ हजार रुपयांची फसवणूक केल्याची बाब समोर अाली अाहे. एकाच सातबाऱ्यावर दोन ठिकाणी उडीद विक्री झालेली अाहे. या प्रकरणी मार्केटिंग अधिकारी पी. एस. शिंगणे यांनी बुलडाणा पोलिसांत दोन दिवसांपूर्वी फिर्याद दिली होती. त्यावरून पोलिसांनी किन्होळा येथील तिघांविरुद्घ गुन्हा दाखल केला.  या प्रकरणी सुरवातीच्या टप्प्यात तिघांविरुद्ध गुन्हे दाखल झाले अाहेत तरी काही मोठे व्यापारी अद्यापही दूरच अाहेत. शेतकऱ्यांचे सातबारे घेऊन दोन-दोन केंद्रावर उडीद विकल्या गेला अाहे. खुल्या बाजारात कमी भावात उडीद खरेदी करून शासनाला हमीभावाने विकल्या गेला. यामुळे शासनाचे संगनमताने लाखोंचे नुकसान करण्यात अालेले अाहे. अद्याप जिल्हा उपनिबंधकांची चौकशी सुरु असून त्यात काही जणांची नावे लवकरच पुढे येणार अाहेत.   नाफेड खरेदीत घोळच घोळ बुलडाणा जिल्ह्यात नाफेडच्या खरेदीत विविध केंद्रांवर घोळ झाले अाहेत. अाता चिखली, बुलडाण्यात उडीद विक्रीतील गौडबंगाल समोर येत असून यापुर्वी संग्रामपूर, शेगाव येथील खरेदी केंद्रावर तूर विक्रीत प्रचंड घोळ झालेले अाहेत. संग्रामपूर, शेगावमध्ये यापूर्वीच गुन्हे दाखल झालेले असून काहींना अद्यापही जामीन मिळू शकलेला नाही. अाता हे उडीद प्रकरण कुठले वळण घेते याकडे जिल्हावासीयांच्या नजरा लागल्या अाहेत.