नगरमध्ये कृषिपंपांना वीजबिल थकबाकीचा झटका

नगर : महावितरणच्या नाशिक परिमंडलात किमान चालू वीजबिल न भरणाऱ्या कृषिपंप ग्राहकांचा वीजपुरवठा खंडित केली जात आहे. त्यात आज रात्रीपर्यंत जिल्ह्यातील १८ हजार ४९१ कृषिपंपांची वीज तोडण्यात आली. ही कारवाई थांबविणार नसल्याचे महावितरणचे वित्त व लेखा विभागाचे व्यवस्थापक विश्‍वनाथ निर्वाण यांनी सांगितले.

कृषिपंप ग्राहकांच्या थकबाकीत नगर जिल्हा राज्यात अव्वल क्रमांकावर आहे. जिल्ह्यातील तीन लाख ५७ हजार कृषिपंप ग्राहकांकडे दोन हजार २८५ कोटी रुपयांची थकबाकी आहे. या कृषिपंपांजवळ २८ कोटी आठ लाख रुपयांची थकबाकी आहे. महावितरणच्या एकट्या ग्रामीण विभागाने (नेवासे, शेवगाव, पाथर्डी तालुका) साडेतीन हजार कृषिपंपांची वीज तोडली.

थकबाकी दिवसेंदिवस वाढतच असल्याने महावितरणला मोठ्या आर्थिक संकटाला तोंड द्यावे लागत आहे. महावितरणकडून कृषिपंपांना सवलतीच्या व नाममात्र दरात वीजपुरवठा केला जातो. मात्र, ही रक्कमही वसूल होत नाही व दुसरीकडे वीजखरेदी, पुरवठा यंत्रणेची देखभाल-दुरुस्ती, सुरळीत वीजपुरवठा व कर्मचारी यावर खर्च करावा लागतो.

विजेच्या क्षेत्रातील उधारीचे दिवसही संपल्याने वीजबिलाची वेळच्या वेळी वसुली अनिवार्य झाली आहे. त्यादृष्टीने आता कृषिपंप ग्राहकांच्या थकीत वीजबिलाच्या वसुलीकडे महावितरणने गांभीर्याने लक्ष दिले असून, एप्रिल ते सप्टेंबरअखेरपर्यंत आकारण्यात आलेले चालू बिल (देयक) म्हणजेच दोन त्रैमासिक बिले न भरणाऱ्या शेतकऱ्यांच्या कृषिपंपांची वीज खंडित करण्याचा निर्णय महावितरणने घेतला आहे. ही रक्कम तातडीने भरून सहकार्य करावे, असे आवाहन महावितरणकडून करण्यात येत आहे.