किसान खेत मजदूर कॉंग्रेसच्या अध्यक्षपदी नाना पटोले

नवी दिल्ली : भाजपला रामराम ठोकून कॉंग्रेसमध्ये प्रवेश केलेले गोंदिया-भंडाऱ्याचे माजी खासदार नाना पटोले यांची "किसान खेत मजदूर कॉंग्रेस'चे अध्यक्ष म्हणून शुक्रवारी (ता.१४) नेमणूक जाहीर करण्यात आली. किसान खेत मजदूर कॉंग्रेस ही कॉंग्रेस पक्षाची शेतकरी व शेतमजुरांसाठीची आघाडी आहे. पटोले यांनी खासदार असताना शेती व शेतकऱ्यांच्या समस्यांशी निगडित प्रश्‍न सातत्याने संसदेत उपस्थित केले होते आणि पंतप्रधान नरेंद्र मोदी यांच्याशी त्यांचा झालेला वाद हा या दोन मुद्यांशीच निगडित होता. त्यामुळे या संघटनेचे राष्ट्रीय अध्यक्ष म्हणून पटोले यांनी नेमणूक झाली आहे. त्यांच्या राजीनाम्याने रिक्त झालेल्या भंडारा-गोंदिया मतदारसंघात जी पोटनिवडणूक झाली त्यामध्ये कॉंग्रेस व राष्ट्रवादी कॉंग्रेसचे संयुक्त उमेदवार मधुकर कुकडे यांना निवडून आणण्यात पटोले यांनी महत्त्वपूर्ण भूमिका बजावली होती. कॉंग्रेस पक्षातर्फे विविध नियुक्‍त्या जाहीर करण्यात आल्या. अन्य एका घोषणेनुसार गोवा प्रदेश कॉंग्रेसच्या संशोधन विभागाचे अध्यक्ष म्हणून डॉ. उल्हास परब यांची नेमणूक करण्यात आली आहे.